Arşiv Okumaları 179

Hu
Hazine-i hâssa-i şâhâne
aded 211

1- İngiltere sefareti me'murlarının Beykozda Hünkar iskelesi civarında kriket oyunu oynamak üzere emsal ve sevabıkı misillü
2- müsaade gösterilmesi istid'a olunmakda olmasına nazaran emr u ferman-ı hümâyûn cenab-ı cihan-dari her ne vechle şeref-sünuh ve sudur
3- buyurulur ise mantuk-ı celiline tevfik hareket olunacağı ma'ruzdur emr u ferman hazret-i men lehu'l-emrindir

fi 16 zilhicce sene 1311 ve fi 8 haziran sene 310

nazır-ı hazine-i hassa
bende
Mikail

Arşiv Okumaları 178

Hû
Hazine-i Hâssa-i Şâhâne
Aded 213

1-Beykoz'da emlak-ı mahsus-ı cenâb-ı cihan-bâniden olan çayırda Kriket yani Ayak Oyunu icra olunmasına müsaade olunması
2-evvelce istirham olduğu gibi Kadıköyü civarında emlâk-ı seniyyeden Kuşdili çayırında dahi bu suretle oyun
3-oynatılmasına müsaâde gösterilmesi İngiltere Sefareti tarafından istid'â kılınmış olmakla emr ü ferman-ı hümâyun cenâb-ı cihan-dâri
4-her ne vechile şeref-sünuh ve sudur buyurulur ise mantuk-ı celiline tevfik hareket olacağını ma'ruzdır. Ol bâb da emr ü ferman hazret-i men lehül emrindir.
fi 15 Zilkade sene 309 ve fi 30 Mayıs sene 308
Nâzır-ı Hazine-i Hâssâ
bende
Mikail

Mucebince icrâ-yı icâbı cevâben yazılmıştır. Fi 18 Zilkade 309

Abd-i memlukları
bende Süreyya

Arşiv Okumaları 177

1- İzzetlü İbrahim Asafi beyefendi namına gönderilmekde olan  tercüman-ı hakikat abone bedeli
2-bizimki ile beraber der-dest-i takdimdir. Galiba muşarun-ileyhin abone müddeti fi 25 N (Ramazan) sene 1301'de
3-hitam bulacakdır. Andan sonra gönderilmemesi kendülerinin ihtarı üzerine arz olunur
4- nam-ı çakeranem kel-evvel devam-ı irsalini hassaten rica ederim
5- hazret-i "Muallim Naci"nin "hamiyyet" " ateş-pare" "yazmış bulundum"
6-nam eserlerinin ilk vasıta ile yetişdirilmesi mürüvvet-i mahsusalarından mütemennadır efendim

Bende-i
Mahmud Avni

Arşiv Okumaları 176

Hu

Muhterem vatandaşlarıma

Meclis-i Mebusanın dağıtılmış kalmış dolayısıyla otuz seneden beri memleketde hükm sürerek birçok namuslı evlad-ı vatanın mahvına ve birçok hanumanların sönmesine sebeb olan istibdad, son zamanda yine şiddetini göstermeğe başladı. Zaten keyfi bir idare neticesi birçok ihtilaller içinde kana boyanan vatan ve milletimizi büsbütün zayıflatarak yakında mahv edecek olan bu istibdada nihayet vermek lazımdır.
Ben, işte bu istibdada karşı milletimin hukukunu muhafaza içün her şeyimi feda ettim, icab eder ise o uğurda canımı da esirgemiyeceğim.
Siz, ey vatanın namuslu ve fakat her şeyden bi-haber olan evladı!  Sizin de bana pey-rev olmanızı ve bu işde bi-taraf kalmanızı dilerim.
Aleyhime hareket edecek olanların görecekleri zararların mes'uliyet-i maddiye ve ma'neviyesi kendilerine aiddir. Yaşasın vatan, yaşasın millet.

Osmanlı Terakki ve İttihad Cemiyetinin Rumeli Teşkilat-ı Dâhiliye ve Kuvve-i İcraiye Müfettişi Umumisi
ve Osmanlı Ordusu Erkan-ı Harbiye Binbaşısı
Bende
Enver bin Ahmed

Arşiv Okumaları 175

Fütüvvetlü Ahmed Efendi
Derkâr olan dirâyet ve ehliyetine mebnî lede’l-arz şeref-müteallik buyurulan irade-i seniyye-i cenâb-ı hilâfet-penâhî mantûk-ı celîli vechile uhdene 16 teşrin-i sani sene (1)330 tarihinde Tabur Hesap Me'murluğu rütbesi tevcîh kılınmış olduğundan her halde ber-mûceb-i kânûn îfâ-yı hüsn-i hizmetle iktisâb-ı feyz u rif’ate sa’y u gayret eyleyesin.
fi 18 rebi'u'l-evvel sene (1)333 ve 21 kanun-ı sani sene (1)330

(mühür)
Harbiye Nazırı Enver

Arşiv Okumaları 174

Bâb-ı Âlî
Dâire-i Sadâret-i Uzmâ
Mektûbi Kalemi
Aded
516

Tezkire-i maruza suretidir
1- Trablusgarb vilâyeti dahilinde Avusturya ve İtalyalı ve ba'zı yerli Musevilerin bukalemun ve kertenkele hayvanatını  canlı olarak toplayıp memalik-i ecnebiyeye sevk ve ihrac eyledikleri
2-ve hayvanat-ı mezkure zararsız olmakla beraber akilü'l-hevvam oldukları cihetle mezruat ve magrûsâta muzır olan  böcek ve kurtları telef ettiklerinden dolayı ziraate pek menfaatli
3- olub bunların cüz'i bir ticaret maksadıyla toplatılarak ihrac edilmeleri  ziraat-i mahalliyenin zararını müeddi olacağı cihetle men'-i ihracları münasib  idüğünden ona göre ifâ-yı
4- mukteziyesinin vilayete tebliğ hususunda dahiliye nezaret-i celilesine havalesi ve rusûmat emanet  ve orman ve ma'den ve ziraat nezaret-i celilelerine ma'lumat itası lüzûmuna dair
5-şura-yı devlet mülkiye dairesinden tanzim olunan mazbata arz u takdim kılınmış olmağla ve ol-babda her ne vechle irade-i seniyye-i hazret-i hilafet-penâhi şeref-sunuh ve sudur buyurulur ise
6-mantuk-ı alisi infaz edileceği beyanıyla tezkire-i senaveri terkim kılındı efendim
Fi 20 Safer 324 Fi 1 Nisan 322
Sadrazam
Ferid


Şeref sadır olan irade-i seniyye-i cenab-ı hilafet-penâhiye meblağ-ı hamiş suretidir
1-Reside-i dest-i tazim olub şura-yı devlet mülkiye dairesinin mazbatasıyla beraber manzur-ı ali buyurulan işbu tezkere-i samiye-i sadaret-penâhileri üzerine mucibince

2-irade-i seniyye-i cenab-ı hilafet-penâhi şeref-müteallik buyurulmuş olmağla ol-babda emr u ferman hazret-i veliiy'ül emrindir

Ser katib-i hazret-i şehriyari
Tahsin

Fi 23 Safer 324 Fi 4 Nisan 322

Aslına mutabıkdır
Bende
Sâdık


1 - suretleri bâlâda muharrer tezkire-i ma'rûze ve şeref-sâdır olan irâde-i seniyye-i Hazret-i Hilâfet-penâhîyi meblağ-ı hâmiş
mucebince rüsumat-ı emanet ve orman ve maadin ve ziraat nezaret-i celilerine tebligat icra kılınmış olmakla dahiliye nezareti celilesinden dahi icra-yı icabına himmet buyurulmak

Fi 25 safer sene (1)324
fi 6 nisan sene (1)322

Arşiv Okumaları 173

1-kâim-makam paşa ve kapudân-ı derya gayret-şiârım
2-gönderdigin telhis-i teselli-i muhlisin ma'lumum oldu. ben
3-yüzümü âlemus'sırr-ı ve'l-hafiyyata tuttum.  benim andan
4- gayrı mu'înim yoktur. ehl-i islamda gayret yok ve bu
5-gayretsizlik bana hayret veriyor. ol cenab-ı hâlıki's-
6-semâvati ve'l-arz bizlere yardım eylesun amin. bu dünyaya
7-gelmeden garaz-ı nefs-i emmareye mütaba'at olmayup ancak
8-ve mâ halaktü'l-cinne ve'l-inse illâ liya'budûn ayet-i kerimesinin
9- mazmun-ı ita'at-makrunuyla âmil olmak içundur
10-bizim büyük düşmanımız nefsimizdir hâlâ âna galip olduğumuz
11-yoktur. her ne vakit nefsimize galib olursak din
12-düşmanları ol-vakt mağlub olur hüdâ ıslah
13- eylesun amin...