Arşiv Okumaları 194

Başvekalet
Kalem-i mahsus müdüriyeti
Aded 3110
Kararname
1- Şapka hadisesi  münasebetiyle akrabasına yazdığı mektubda idare-i hükümet aleyhinde bulunduğu
2- anlaşılan 9. kolordu muhabere bölüğü efradından mehmed fevzinin takrir-i sükun kanunu mucebince
3- istiklal mahkemesine tevdii, müdafaa-i milliye vekaletinin 31 kanun-ı evvel sene (1)341 tarih ve 4603 numrolu
4- tezkeresiyle vukuu bulan teklifi üzerine icra vekilleri heyetinin 31 kanun-ı sani sene (1)926 tarihli icmaaında
5- tasvib ve kabul olunmuşdur.
31 kanun-ı sani sene (1)926
Reis-i cumhur
Gazi Mustafa Kemal

Arşiv Okumaları 193

Hu
Akşehir kazası tütün reji müdürü Mehmed Vedad beğ hazretlerine
meal-i hicabi ağabeyim efendim hazretleri. hassaten ellerinizden bûs ve selâm ederek hâtır-ı âlinizi suâl eylerim. Yengem yegane hanımın ellerinden öperek Süheyl beyle Pervin hanımın gözlerinden öperek hatırlarını suâl eylerim.
Kardaşımız, ablamız İvaz hanım, arz-ı selam u ihtirâm ider.Pederimiz, iki aydan beri ishalden yataktadır. Yediği (süt, yoğurt, patates, suda yağsız pirinç lapası) pehrizdir. Beş altı günden beri ishal durdu. Gayet zayıf düşmüştür. Merdiverleri çıkamıyor. Şimdi perhiz değil ise de ekmek, yemek canı istemiyor. Ancak süt ve yoğurta devam ediyor. Bir kıyye süt 40 yoğurt elli kuruştur. Ayakları dizlerine kadar şişmiş bazen daha yukarı şişerse de yine iniyor. Ayakları tamamiyle şişi inmiyor. Fenalık galiba şah damarlarındadır. Yatakta boyuna yatarsa ehven görünür. Ayakta ve sandalyede bağdaş diz üzeri oturur. Ve yatakta ayaklarını toplar ise te'sîrini icrâ eder. İvaz ablam me'mûriyetde olup kendisine ve bize muâvenet-i insâniyetkârânede  bulunmakla "ve bi'l-vâlideyni ihsânen" âyet-i Kerimesine mazhar olmuştur. Ve billâhi'l-hayr ben dahi Şehremininde, Çapa'da dâru'l-muallimât üçüncü senesi i'dâdîsine devâm ve uzak olduğundan gidip gelmek tramvay parasını günde altı kuruş bana da yevmiye 4 kuruş ki İvaz ablam günde 10  kuruş veriyor. Ömrüne , kesesine , sıhhatine ve devâm-ı âfiyetine (Allahu teâlâ) hazretlerine duâ ediyoruz. İnşâallâh ben dahi mektebi ikmâl ve me'zûn oldukda muâvenetten geri kalmam.

Arşiv Okumaları 192

Efendi oğlumuz
Bilhassa hayr dualar olunur. seferberlik münasebetiyle mahdum askere gitti. tekkenin ta'amiyesini de veriyorsa Her halde üç kile buğday himmet edilecek olursa şu müteannid zamanda son derece memnun olunacak ve dergaha büyük bir hizmet etmiş olacaksiniz. Çünkü etmeklik buğday kalmadı. Baki Hu.
Dükkanın icarı olan ellialtı guruşa bedelen

Arşiv Okumaları 191

1- Sofya - Hemşîre-i muhteremem 'iffetlü efendim hazretleri
2- Geçen gece bi'l-yümni ve'l-âfiye bir duhter-i pâkize-ahterin kadem-nihâde-i âlem-i şuhûd olduğunu dün akşam
3- Kemâl-i meserret ve mefharetle istibşâr eyledim Cenâb-ı Hakk kendisini ebeveyni ve sevgili kardaşları ve bi'l-cümle
4- Müte'allikîn ve müte'allikâtıyla beraber atvel-i 'ömr ile muammer etsün ve vilâdetini cümlenize müteyemmen ve mübârek
5- Eylesün âmîn inşâallâh anın ve kardaşlarının lisânımızda mürüvvet ta'bîr olunan
6- Nice mûcib-i meserret ve mefharet hâllerini müşâhede ile iktisâb-ı menn ü ibtihâc eylersiniz
7- Tıfl-i nev-zâdın yümnle kademinden mehd-i vücûd olduğu ve gerek anın ve gerek zât-ı âlî-i
8- 'iffetânelerinin sıhhat ü âfiyetiniz ber-kemâl bulunduğu müjdesini bir memnûniyyet-i azîme ile ahz ederek
9- Cenâb-ı Hakka arz-ı şükrân ve tahmîdât eyledim ve bâ-telgraf temniyât-ı hâlisâne ve hissiyât-ı birâderânemle
10- arz-ı tebrîkâta müsâra'at etdim. O güzel sevgili Mehrî'nin pabucları dâma atılacak mı?
11- Yok yok andaki olan büyüklük hakkı küçük hemşîresi hakkında kendisinden ziyâde
12- izhâr-ı muhabbete müsâade edemez cümlesi hakkındaki muhabbet ve mu'âmele derece-i mütesâviyede olmak elzemdir.

Arşiv Okumaları 190

sahh
Darbhane-i Âmire Nâzırı efendi
1-Galata'da vuku'bulan harikde haneleri muhterik olan ehl-i İslâmın muhtac ve müstahkıkına tevzi' olunmak
2-üzre ihsan-ı hümayun-ı şahane buyurulan mebaliğden başka yine evkaf-ı hümayun nazırı inayetlü efendi
3-ma'rifetiyle tevzi' ve taksim olunmak üzre yirmi beş bin ve rum ve ermeni ve katolik milletleri biçare-gan ve fukarasına
4- elbise baha namıyla batrik ve piskoposları ma'rifetleriyle tevzi' ve i'ta olunmak üzre beher-millete  onar bin
5- guruşdan otuz bin guruşuna cem'an elli beş bin guruşun darbhane-i amireden i'tası
6- hususuna irade-i ihsan-ade-i mülükane ta'allukuyla ol-babda hatt-ı şerif-i inayet-redif-i tac-dari
7- merhamet-efza-yı sahife-i sudur buyrulmuş olmağla ber-mantuk-ı irade-i aliyye salifü'z-zikr elli beş bin
8- guruşun  bab-ı aliye irsali hususuna mübaderet eyleyesüz deyu buyruldu
fi 25 safer sene (12)41

Arşiv Okumaları 189

Devlet-medârâ veliyyu'n-niama efendim hazretleri
1- Bi-havlillahi te‘âlâ bir tarafdan tertîb ve tahrîr ve teksîr buyrulmakda olan süvâri ve piyâde ‘asâkir-i hassa-i şâhâne ve ‘asâkir-i mansûre-i
2- Muhammediye'ye mukteza olan feslerin der-‘aliyye-i ebediyyü'l-karârda dahi i‘mâl olunmasına irâde-i ‘aliyye-i mülûkâne ta‘alluk buyurulub
3- iktizâ eden fesci ustalarından ve ‘amele ve hademelerinden ifrâz ve husûs- âhara me'mûr dündâr-ı kapudan-ı derya ‘izzetlü
4- Ali Bey oğlumuz bendelerine terfîkan gönderilmesini emr-i şerîf - efzâ-yı sahîfe-i sudûr olan fermân-ı celîlü'l- ‘ünvân feth u kıra'at
5- ve tıbk-ı irâde-i seniyye-i şâhâne der ‘akab esnâf-ı mezkûr emîni ma‘rifetiyle meşhûr ustalardan ifrâz ve her bir muktezi
6- ‘amele ve hademelerinden tedârük ve tachîz olunan korvet sefinesine irkâb ve mir-i mûma-ileyh oğlumuz bendelerine terfîkân
7- ba‘s olundukları karîn-i ‘ilm-i müşîrleri buyrulmak içün işârete ibtidâr kılındı ol bâbda lutf u kerem efendim Sultânım hazretlerinindir.
Fi 9 B (Recep) Sene (1)237

Arşiv Okumaları 188

Ma'ruz-ı Çakerileridir ki
1- Nezâret-i ‘aliyye-i âsafânelerinde asûde-i evkâfdan mütevellisi olduğum cennet-mekân-firdevs-i âşiyân Ebu'l-feth gâzi Sultân Mehmed Hân ‘aleyhi'r-rahmeti ve'l-gufrân hazretlerinin
2- efkâf-ı şerîfelerinden câmi‘-i şerîfleri civârında kâin binâ ve ihyâ buyurdukları dârü'ş-şifânın mukaddemâ yüz altmış tarihlerinde zelzele vukû‘unda
3- ekser kubbeleri münşakk olarak fenâ-pezîr olması ve ol vakitden berü ta‘mîr olunamayub hâli kalması hasebiyle el-hâletü'l-hazihi külliyyen harâbe-müşrif olmuş
4-olduğundan başka mezkûr kubbeler üzerinde pûşîde kurşunları ve hadîde müte‘allik ba‘zı eşyâ dahi gün-be-gün telef ve zâyi‘ olmakda olmağla
5- hassa mi‘mâr başısı ağa tarafından erbâb-ı vukûf ta‘yîniyle ba‘de'l-mu‘âyene ta‘mîri yâhud dârü'ş-şifâ-yı mezkûr ol vakitlerden berü kullanılmayub
6- mu‘attal durduğuna nazaran vakf-ı şerîfi beyhûde masârifden vikâye-i hâli üzere terkle kurşunların me'men bir mahalle vaz‘ u hıfz
7- olunmak üzere tecdîdi ve yâhud hedmi irâde buyrularak mevcûd olan taş temurleriyle (demir) bir takım kârgîr dekâkîn ve mâ‘ada ‘arsa
8- üzerine dahi münâsibi vechile ta‘yîn-i icârâtla ahşâb hâneler inşâ ve tanzîmi şıklarından vakf-ı şerîf-i mezkûra kangısı ehven
9- ve enfa‘ ise ol babda emr u fermân hazret-i men-lehu'l-emrindir.

OSMAN (mühür)