Arşiv Okumaları 172

1-Mekke-i mükerreme kadısına hüküm ki südde-i saadete defter gönderüp etrafdan ka'be-i şerife ziyaretine gelen fukaranın bir mesken-i muayyeni olmadığından harem-i şerifde
2-birer mevzi'a konmağla harem-i şerife televvüs-i arizi olup kehleleri yayub amme-i müslimin bu aharlardan ziyade muzdarib olduklarından bahisle  bir  mesken
3- tedariki lazım olduğundan akdem arz olunub merhume sultan hazretlerinin mekke-i mükerremede olan imaretleri kurbunda taife-i mezbure mesken
4-bina olunmağa münasib yerler satun alub bina olunmak sadedinde iken südde-i saadet-i savbına  teveccüh lazım olub evvel alınan mahal el'an halidir
5-mezbure fukara içün haliya bir mesken yapılmasın arz eylemişsin buyurdum ki deyu el-yevm ki arz olunduğu üzre zikrolunan mahalde fukara içün bir mesken
6-yapılub harem-i şerifi televvüs ve tedennüsden tathir ve pak  eyleyesüz

Arşiv Okumaları 171

1. Manisa kadısına hüküm ki mektub gönderüp Mehmed nam kimesne kendü evine muttasıl olan mescidin divarına tavuk kümesi yapup ve kadimden
2-olan mezarlara divar çeküp havlusi içine aldıği şer'ile sâbit ve zahir olup hedm olmasiçün konşusu hacı Ahmed
3. Adem iletdikde mezbur hacı Ahmedi külüng ile urmak isteyüp ve muhzır gönderüp ve muhzırı dahi itaat-i şer'
4. Etmedüğin bildirmişsin  imdi buyurdum ki mezbur mehmedi küreğe koşmak içün bu canibe gönderesin

Arşiv Okumaları 170

Hakkari hakimi seyyid mehmede hüküm ki mektup gönderüp
yukaru canibe müteallik bazı ahvali i'lam etmişsin
her ne ki demiş isen arz-ı huzura arz olunup ilm-i şerifim
muhit olmuşdur buyurdum ki varıcak min ba'd dahi yukaru caniben
yarar casuslar gönderüp ahval ve etvarlarına temam ıttila'
tahsil edüp dahi vakıf ve muttali' olduğun ahbar-ı sahihayı
i'lam etmekden hali olmayasın

Arşiv Okumaları 169

1. Arab  canibi defterdarı mehmed çelebiye hüküm ki haliya südde-i saadetime mektub gönderüp şam beğlerbeğisi emirü'l-ümerai'l-kiram ahmed dame ikbaluhu sana mektub
2. Gönderüp şimdi(ye) değin kafile-i hüccac ile yüz nefer sipahi ve yüz elli nefer yeniçeri ve hisar eri ki cümle İkiyüz elli nefer adam gönderilirdi bu sene
3. Nesim nam arab itaat suretin gösterüp gelüp temam surresin alup gitdikden sonra beriyede hayli kabayil ve adam cem' edüp hareket üzre
4. Olduğı casuslar haber verüp hüccaca zarar yetişdurmek tevehhüm olunur elli nefer sipahi ziyade irsal olunmak lazımdır deyu ilam edüp hüccac dahi
5. Mah-ı şevvalin on sekizinci gününde teveccüh eyleyüp arz olunup cevab gelmeğe zeman olmaduğı ecilden müşarün-ileyh tayin eylediği üzre elli nefer
6. Sipahilerün mekülatı ve  aliklerin ve develerin tedarik olunup virüldiğin bildirmişsin imdi husus-ı mezbur müşarün-ileyh mukaddema südde-i saadetime
7. Arz edüp ol babda sana hükm-i şerif gönderilmişidi buyurdum ki vusul buldukda mucibi ile amel edesin

Arşiv Okumaları 168

Yazıldı
Trabzon'a varınca derya kenarında vaki' olan kadılara hüküm ki, bundan akdem  Dergah-ı Mu'alla çavuşlarından Mehmed zide kadruhu ile hükm-i hümayunum gönderilüp taht-ı kazanda ne mikdar neccar bulunursa yazup defter edüp yarar kefillerin alup Südde-i Sa'adet'ime gönderesin deyü emrim olmuş idi. haliya neccar hususu gayet mühim olup emr-i sabıkım mucebince taht-ı kazanuzdan neccar gönderilmemeğin buyurdum ki Çavuşum İsa vardıkda asla te'ehhür ve tevakkuf etmeyüp hükm-i sabıkım mucebince taht-ı kazanuzda bulunan neccarı ne mikdar var ise yazup defter idüp hidmete kadir yarar olanların kefile verüp dahi yanlarınca getürmek içün yarar ademlerinüz koşup defterinüzle Südde-i Sa'adet'ime gönderesin ki geldüklerinde defterünüz mucebince yoklanup, gelmeyüp emrime muhalefet edenleri kefillerine buldurup haklarından geline neccara ziyade müzayaka vardır ihmal ü müsaheleden hazer eyleyesin sonra özrünüz makbul olmaz kadılığınız ahara verilür ana göre mukayyed olasın amma bu bahane ile hidmete kadir olmayanlardan celb-i mal olunmağla alıkonulup pir olup veya adem-i kudreti olanlar yazılup gönderilmekden hazer eyleyesin

Arşiv Okumaları / 167

Kaymakam Pâşâ ve Kapudân-ı Deryâ gayret-şi’ârım
Gönderdiğin telhîs-i teselli-i muhlîsin mâ‘lûmum oldu. Ben yüzümü Cenab-ı Âlime’s-sırri ve’l-hafiyyâta tutdum benim andan gayrı mu’înim yoktur. Ehl-i İslâm’da gayret yok ve bu gayretsizlik bana hayret veriyor. Ol Cenâb-ı Haliki’s-semâvâti ve’l-ard bizlere yardım eylesün. Amin… Bu dünyâya gelmekden garaz nefs-i emmâreye mütaba‘ât olmayub ancak “ve mâ halaktu’l-cinne ve’l-inse illâ li-ya’budûnî” ayet-i kerimesinin mazmûn-ı ita’at-makrûnuyla âmil omak içündür. Bizim büyük düşmânımız nefsimizdir hâlâ ona gâlib olduğumuz yoktur. Her ne vakit nefsimize gâlib olursak din düşmânları ol vakit mağlâb olur. Hüdâ islâh eylesün. Âmin…

Arşiv Okumaları / 166

Edirne Vilayeti

Edirne İngiliz Murahhas Askeriliğinin 9 Teşrin-i Evvel sene 919 tarih ve 4/102 numerolu takriri suretidir.
Dahiliye Nezaret-i celilesi emriyle vilayet vekaletine tayin buyurulduğunuzu müş'ir 8 Teşrin-i evvel Sene 919 tarih ve 803 numerolu tahrirat-ı aliyeleri ahz. olundu. Her ne kadar Osmanlıların hükumetinin hukukuna riayet etmek bizce mukarrer ise de sükun ve huzur-ı umumiyi ihlal edecek her türlü vak'adan hükümet-i mahalliye ile kuvayı milliye meclisini mesul tutacagımı işar-ı vazife bilirim.
Sükun ve huzur-ı umumiyi ihlal edecek ahvalin neticesi vilayet-i mü'telifeyn kıtaatı tarafından işgal olunacaktır.
İhtiramat-ı faikamın lütfen kabul buyurulmasını temenni ederim.

Arşiv Okumaları / 165

Dârende-i tezkere
1- İran devleti teba‘asından Mirza Hüseyin Ali bu def‘a müte‘allikâtıyla berâber Bağdad cânibine ‘azîmet etmiş
2-olduğundan hudûd-ı devlet-i ‘aliyyeden mahall-i mezkûra varınca esnâ-yı rahda mürûr ve ‘ubûruna
3- mümâna‘at olunmayıp icâbına göre me'mûrîn-i ‘askeriyye ve belediye taraflarından i‘ânet ve himâyet kılınmak içün
4- taraf-ı sefâret-i seniyye-i devlet-i ‘aliyyeden iş bu tezkere tahrîr ve i‘tâ kılındı.
Fi 3 R.sene 69

Arşiv Okumaları / 164

düstur-ı mükerrem müşîr-i müfAHham nizamü'l-âlem müdebbir-i umuri'l-cumhur-i bi'l-fikrİ'S-SAKIB mütemmimi-i mehâmMi'l-enâm bi'r-re'yi's-sâib MÜMEHHİD-İ BÜNYANÜ'D-DEVLETİ VE'L-İKBAL MÜŞEYYİD-İ ERKAN-I Erkani's-sa'adeti ve'l-iclal el-mahfuf bi-sunufi avatıf-ı'l-meliki'l-a'la Darbhane-i Amirem Defterdarı vezir-i dirayet-semirim es-seyyid Mehmed Hasib Paşa edamallahu te'ala iclalehu tevkı'-i refi'-i hümayun vasıl olıcak ma'lum ola ki sen devlet-i aliyyem mesbuku'l-hidme kar-güzar ve müstakım ve sadakat-karlarından

Arşiv Okumaları 163

Benim Vezirim. Bu gün ne tarafa binişe azîmet edersin? Canım paresi kızım nicedir? Mübarek mizaçlarının sıhhati ile beni mesrûr eyleyesin. Benim vücudum el-hamdülüllâhi Te'ala sıhhat üzeredir. Taraf-ı hümayunumda olanlar dahi sıhhatledir. Ma'lumun oldukda cevabını yazıp bildiresin.

Arşiv Okumaları 162

Hüve

Adana vilâyeti

mektûbî kalemi

aded: 7

Dâhiliye nezâret-i celîlesi cânib-i ‘âlîsine

Devletlu efendim hazretleri

Teb‘a-i yunaniyeden ve tüccardan adana’da mukîm Atnaş Taripânının mersinde hudûd-u muayyene dâhilinde krom ve petrol ve ma‘den kömürü taharrisi içün virilen ruhsat-nâmenin ibtâli lâzım geleceğine dâ’ir şûrâ-yı devlet tanzîmât dâ’iresinden sâdır olan karârı hâvî şeref-vârid olan 10 kânun-ı sâni sene 322 tarihli ve yüz seksen numerolu emir-nâme-i ‘âli-i cenâb-ı nezâretpenâhileri mazâ-ı ‘âlisi mumâ-ileyhe bi’t-teblîğ mâ‘den-i mezkûrenin emr-i taharrîsi hakkındaki mu‘âmelâtı ol-vakit mer‘î bulunan nizam-nâme mûcebince îfâ ile orman ve ma‘âdin nezâret-i celîlesinin emr-i mahsûsuna binâ’en meclis-i irâde-i vilâyetce taharrî ruhsatı i‘tâ olunduğundan ve fahrî tercümanlık me’mûriyetinden dahi isti‘fâya dahi hâzır bulunduklarından ve ifâdât-ı sâ’ireden bahisle mezkûr ruhsatnâmenin ibtâli hakkında dâ’ire-i müşârun-ileyhâca ittihaz buyrulan karar meclis-i ‘âli-i vükelâca bi’t-tedkîk lâzıme-i ‘adâletin ifâsını müsted‘î bu kere i‘tâ eylediği ‘arzıhâl aynen ve leffen takdîm kılınmış ve icrâ-yı icâbı merhûn-u müsâ‘ade-i celîle-i âsıfâneleri bulunmuş olmağla ol-bâbda ve her hâlde emr u ferman hazret-i men-lehü’l-emrindir

Fî 6 safer sene 325 ve fî 7 mart sene 323

Adana valisi

bende

Arşiv Okumaları 161

Hüve
İzmit Mutasarrfılığı
Tahrîrât Kalemi
Numero
304

Dâhiliyye Nezâret-i Celîlesine

Devletlü Efendim Hazretleri
İdâre-i Umûmiyye-i Dâhiliyye Müdîriyyeti’nden muharrer 4 Ağustos  sene  36 tarih  ve 23015/278  numerolu tahrîrât-ı aliyye-i nezâretpenâhîleri arîza-i cevâbiyyeden  kasabaya câri su yollarının demir künklerle ıslah ve ta`miri ve suların muntazaman isâlesi içün sûret-i husûsiyyede istifâde edenlerden  Meclis-i Umûmiyye-i Liva’ca kebul edilen ta`rife mûcebince ale’ d- derecât bir ücret-i maktû`a ahz edilmekde ve Meclis-i İdâre-i Liva ve Belediyece müttehaz karâra tevfikan ücreti mertebeli vermeyenlerin suları münkatı` olmakda olub Yukarıpazar Hamamı mutasarrıfesinin bu tarz mu` âmeleyi bir i`âne sûretinde  göstermek  sûretiyle  makâm-ı âlî-i nezâretpenâhîlerine vâki` olan istid`âsı gayr-i vârid ve ücretini vermemekten dolayı yalnız su verilmeyen hamamın seddedildiği hakkındaki ifadesi de hilâf-ı hakikat bulunduğu  ve esâsen üç senelik  ücretin tâbi` olduğu yetmiş beş lirayı def `aten tesviyeye adem-i iktidârı tebeyyün ettiği takdirde başkaca tensib edilecek  bir müddet  zarfında maktû` en tesviyesine muvafakat eylediği halde hamamına su isâlesine  müsâ` ade  edileceği  başkaca vukû` bulan istid`âsı üzerine mezkûr hamam müste’ cirine takdim kılınmış olduğu arz olunur ol bâbda emr ü fermân hazret-i men lehü’ l emrindir

Fî Zilkâ`de sene 38  ve Fî 12 Ağustos sene 36
İzmit Mutasarrıflığı
Mühür

Arşiv Okumaları 160

 Hazret-i izzet cellet kudretuhu ve allet kelimetuhunun (Allah'ın) inâyeti ve mühr-i sipihr-i nübüvvet ahter-i burc-i fütüvvet-pişvâ-yı zümre-i enbiyâ muktedâ-yı fırka-i asfiyâ Muhammed Mustafâ'nın sallallahu aleyhi vesellem mu‘cizât-ı kesîretü'l-berekâtı ve dört yârinin -ki, Ebubekir, Ömer, Osman ve Ali'dir- rıdvânullahi aleyhim ecma‘în onların ervâh-ı mukaddesesi mürâfakati ile

 Ben ki Sultanü's-salâtin ve bürhânü'l-havâkîn tâc-bahş-ı hüsrevân-ı rû-yı zemîn zıllullahi fi'l-arazîn Akdeniz'in ve Karadeniz'in ve Rumeli'nin ve Anadolu'nun ve

 Karaman'ın ve Rum'un ve Vilâyet-i Dülkadriyye'nin ve Diyarbekir'in ve Kürdistan'ın ve Azerbaycan'ın ve Acem'in ve Şam'ın ve Haleb'in ve Mısır'ın

 ve Mekkenin ve Medine'nin ve Kudüs'ün ve külliyyen Diyâr-ı Arab'ın ve Yemen'in ve dahi nice memleketlerin ki, âbâ-yı kirâm ve ecrâd-ı izâmım enârallahu berâhinehüm kuvvet-i kahireleriyle feth ettikleri

  ve cenâb-ı celâlet-me’âbım dahi tîğ-ı ateş-bâr ve şimşîr-i zafer-nigârım ile feth eylediğim nice diyârın sultanı ve padişahı Sultan Bayezid Han oğlu 

 Sultan Selim Han oğlu Sultan Süleyman Han'ım, Sen ki, Françe vilayetinin Kralı Françesko'sun... Dergâh-ı selâtîn-

 -penâhıma yarar adamın Frankiyan ile mektup gönderip ve bazı ağız haberi dahi ısmarlayıp memleketlere düşman müstevli olup el-an hapisde idüğünüz i‘lâm edip

 halâsınız husûsunda bu cânibden inâyet meded ve inâyet eylemişsiz. Her ne ki, demiş iseniz benim pâye-i serîr-i âlem-masîrime arz olunup alâ-sebîli't-tafsîl ilm-i şerîfim muhît olup tamam ma‘lûm oldu.

 İmdi padişahlara sınmak ve haps olunmak acep değildir. Gönlünüzü hoş tutup âzürde-hâtır olmayasız. Eyle olsa bizim âbâ-i kirâm ve ecdâd-ı izâmımız nevverallahu merkadehüm dâimâ def‘-i düşmân

 ve feth-i memâlik için seferden hâli olmayıp biz dahi onların tarikine sâlik olup her zamanda memleketler ve sa‘b ve hasîn kal‘alar feth eyleyip gece ve gündüz atımız eyerlenmiş

 ve kılıcımız kuşanılmış ve Hak sübhânehu ve te‘âlâ hayırlar müyesser eyleyip meşiyyet ve irâdeti neye müte‘allik olmuş ise vücûda gele. Bâkî ahvâl ve ahbâr ise mezkûr adamınızdan 

istintak olunup ma‘lumunuz ola. Şöyle bilesiz... Tahrîren fî evâil-i Âhiri'r-Rebî‘ayn li-sene isneyn ve selâsîn ve ti‘a-mi’e. [1 Rebiülahir 932 (15 Ocak 1526)[

Be-makam-ı Dârü's-Saltanati'l-Aliyyeti'l-Kostantıniyye el-Mahmiyyeti'l-Mahrûse

Arşiv Okumaları 159

Sicl-i Umumi
Mataracızâde lakabıyla mulakkab Rizeli Tüccardan müteveffa Hacı Hamid Efendi’nin oğludur.Bin ikiyüz seksen üç senesi şehr-i Recebi gurresinde 28 Teşrin-i Evvel sene (12)82 Rize kasabasında tevellüt ettiği nüfus tezkire-i Osmaniyyesi suretinde muharrerdir.Mukaddemât-ı ulûmu kasaba-i mezkure sıbyan mektebinde tederrüs ve bir müddet de mekteb-i rüşdîde tahsil eylediği ve Türkçe okur yazar olduğu tercüme-i halinde mesturdur. Bin üçyüz on senesi şehr-i Zilhiccesi selhinde 1 Temmuz sene (1)309 mülâzemetle Rize Rüsûmât İdaresi’ne devam edip üçyüz on üç senesi Cemaziyelahirinin yirmi beşinde 30 Teşrin-i Sânî sene (1)311 üçyüz kuruş maaşla idare-i mezkure mülhakatından Askaros Kordonu Rüsumat Memurluğu’na tayin olunmuştur.Mûmâ-ileyhin vazife-i mezkureyi ifa eylediği ve tercüme-i hal varakasıyla nüfus tezkeresinin muvafık idüğü Trabzon Rüsumat Nezareti’nden tasdik kılınmıştır.Mûmâ-ileyhin zikr olunan mülazemet tarihiyle müddeti memuriyet-i hazırasına tarih-i tayin ve miktar-ı maaşı makrun-ı hakikat idüğü Rize Rüsumat Müdüriyyeti’nden tasdik edilmiş ve nüfus tezkire-i Osmaniyesinin sureti asl-ı tercüme-i hal varakasıyla şubece hıfz olunmuştur.Fî 28 R. sene 1324 ve 8 Haziran sene (1)322.Mûmâ-ileyhin 19 Teşrin-i Sânî sene 1312 tarihinde iki yüz elli kuruş maaşla Rize Rüsumat Müdüriyeti maa Mısır Anbar Kitabeti’ne ve 12 Teşrin-i Evvel sene (1=321 tarihinde maaşıyla Samsun Rüsumat Müdüriyeti Muayene Kitabeti’ne nakil ve tahvil olunarak kefil irae edemediğinden dolayı 7 Kânûn-ı Evvel sene (1)321 tarihinde açığa çıkarılmış ve 6 Mart sene (1)326 tarihinde üçyüz elli kuruş maaşla Polathane Rüsumat Kitabeti’ne tayin olunmuş ise de yine kefil irae edemediğinden müstafi addedilerek Maliye Nezareti’nin 10 Teşrin-i Evvel sene (1)327 tarihli tezkiresi hükmüne tevfikan ahvâl-i külliyesi bi’t-tedkik câizü’l-istihdam addedilmesine dair yazılan 27 minhü tarihli derkenâr üzerine tarih-i mezkura edilen mucebince işareti üzerine mûmâ-ileyhin cevâz-ı istihdâmına karar verildiği 28 Haziran sene (1)328 ve 23 Teşrin-i Evvel sene (1)328 tarihli vukuat pusulasıyla müzekkire-i cevabiyyeden anlaşılmıştır.

Arşiv Okumaları 158

Hû
Dâhiliye Nezâreti Emniyyet-i Umûmiyye Müdîriyeti
Şubesi

Aded

Mamûretülazîz Vilâyeti'nden alınan 11 Mayıs sene [1]332 târîhli telgrafnâmenin sûretidir.

C. [cevab] 8 Mayıs sene [1]332. Rusların Ermeni çeteleriyle birlikde Bitlis ve Muş ve civârında istîlâ eyledikleri sâ’ir mahallerde; kadınları ve çocukları katletmek, ırz ve nâmûsa tecâvüzde bulunmak gibi birçok fecâyi‘ ve şenâyi‘de bulundukları, zulm ve tecâvüzlerinden kurtulup da buralara can atmış olan muhâcirînin ifâde-i müdelleleleriyle mertebe-i sübûtdadır. Bu bâbda gerek mülhakât ve gerek merkezce muhâcirlerden müfredâtıyla alınacak ma‘lûmâtın ehemmiyetleri telgrafla ve diğerleri posta ile arz olunacakdır.

Arşiv Okumaları 157

bimennihî  teâla Sivastan Yozgata varıncaya kadar yol üzerinde vâkî' kazalar naibleri meveddetlü efendiler zîde ilmuhum ve müdürleri hamiyyetlü ağalar zide kadruhüm inhâ olunur ki darende-i buyruldu tarikat-i aliyye-i kadiriyeden şeyh hasan efendi bazı maslahat zımnında yozgat canibine azimet etmiş olmağla merkumun yedinde bulunan mürur tezkiresi mucibince müruruna mumane'at olunmamak ve beytutet eylediği mahallerde
hakk-i müsaferetine riayet ve hürmet ve nizamı vechile yem ve yiyeceğinin akçesiyle itası mahuf ve muhataralu olan yerlerde lüzumu miktar-ı cübbelünün terfikiyle emn-i bi's-selame mahall-i maksudunai'zam ve isrası babında divan-ı eyalet-i sivastan işbu buyruldu tahrir ve tastir ve yedine i'ta ba's u tesyîr olunmuştur bi-mennihi teala vusulünde gerekdir ki ber-muceb-i buyruldu amel ve hareket eyleyesin deyu buyruldu
fi 5 Ra sene 66

Arşiv Okumaları 156

Darü's-sa‘adetim ağası Ummi Sultan'ın kalkan taayyünât kahvesinden altı vukiyye kahveyi altı vukiyye şekeri hâlâ İstanbul'da harem-i hümâyûnumda saray  ustası Nâziki Ustay'a ihsân eyledim. Ve andan sonra dahi her kim gelüb saray ustası olursa anlar da yesünler benim îcâdım olsun zira ben sarayda oturdum ziyâde halleri mükerrerdir. Onde saray ustası olanların kilerci başı çağırdub tenbih idesin deftere kayd oluna. Fermanım mûcibince ‘amel oluna.
Fi 5 RA Sene 1109

Arşiv Okumaları 155

benim vezirim bu galata kaliçe esnafları üç dört defa arz-hal eylediler olmadı bir netice verilmedi galata kadıları mı karuşur yoksa voyvodalar mı karuşur. kanun nice ise öylece hükm idüp kat-ı niza' ola. mahalinden der kenar edüp nice ise ve nice görülür ise arz eyleyesiz ve hadim oğlu şakinin keyfiyeti tahkik oldukda katli ne mübaşereret oluna. asitanede sahib olan kimdir? anı tecessüs eyleyüb iğlam eyleyesiz. tükman ağalığı çapar oğluna iltizam ettiresiz. ol mikdar akçe teslim etmek üzre ve paşa-yi mezbura söyleşilen eyaletle ve maan bursa teveccüh -i hümayunum olmuşdur.

Arşiv Okumaları 154

Vefiyyü'l-himema devletlü atufetlü efendim hazretleri

1. İllet-i müvahhişe suret-i tahaffuz ve tedavisini mutazammın ba-irade-i seniyye ser-etıbba-ı hassa-i hazret-i cihandari semahatlü efendi hazretleriyle
2. Biraderlerinin kaleme aldıkları layiha bu babda olan tezkire ile beraber irsal suy-i samileri kılınmış olmağla masarıfat nazırı
3. Efendi bendeleriyle bi'l-müzakere icra-ı iktizası menut-ı himem-i seniyyeleridir efendim.

Arşiv Okumaları 153

Devletlû i'nâyetlû mürüvetlû veli-ni'metim efendim tâle bekâhu hazretleri
1. Cuma gününden berü galebe-i nezle ile çend ruzdur ki sahil-hane-i daiyanemde mutekif günc-i inziva iken
2. Bi-inayetillahi teala bugünkü gün asar-ı sıhhat zuhuruyla inşaallahu teala yarın takrir-mezbure icaleten kaleme alınup
3. Mersul-i hak-i pay-i devletleri kılınacağı malum-ı asafaneleri buyuruldukda emr ü irade hazret-i men lehü'l-emrindir.

Arşiv Okumaları 152

seniyyü'l-himemâ behiyyü'ş-şiyemâ inâyetlü atûfetlü oğlum efendim hazretleri
yenişehir'den yanya cânibine gelecek iki alay ile evlâd-ı fâtihân'dan müretteb on üçüncü alay kaimmakamı bulunan ahmed beğ maiyyetinde olan üç tabur asakir-i muntazamanın çadırları eskimiş olduğundan tecdidi hususu Tırhala mutasarrıfı atufetlü Emin paşa hazretleri tarafından inha olunmuş olunduğuna dair mansûre defterdârı atûfetlü efendi hazretlerinin bir kıt'a takrîri manzûr-ı âlî-i cenâb-ı mülukâne buyurulmak üzre mersûl-ı savb-ı vâlâları kılındı takrîr-i mezkurde gösterildiği vechle mezkûr çadır takımıyla eşyâ-yı sâirenin ber-mûceb-i pusula mihimmat-ı hıyamiyye ve harbiye taraflarından tertîb ve i'tâsı muvâfık-ı irâde-i seniyye-i cenâb-ı şâhâne buyurulur ise iş'ârı menût-ı himmet-i behiyyeleridir
Fi M. (Muharrem) 25 Sene 53

Maruz-ı bendeleridir ki
reside-i dest-i tevkir olan işbu emirname-i samileriyle takrir-i mezkur mübarek ve mualla hak-pa-yı tutiya sa-yı cenab-ı cihanbaniye arz ve takdim birle meşmul nazar-ı atıfet-eser hazret-i hilafet-penahi buyrularak takrir mezkurda gösterildiği vechle mezkur çadır takımıyla eşya-yı sairenin ber-muceb-i pusula mühimmat-ı hıyamiyye ve harbiyye taraflarından tertib ve i'tası hususuna irade-i seniyye-i şahane sâniha-pîrâ-yı sudur buyurulmuş ve takrir-i mezkur mevzû'an iade kılınmış olmakpla ol babda emr u ferman hazret-i men-lehü'l emrindir
fi 29 m. sene (1)253

Arşiv Okumaları 151

VEZİR-İ MEÂLi-SEMİRİM HÜSEYİN HİLMİ PAŞA

1 - Kâmil Paşa'nın hasbe'l lüzum vukû-ı infisâline mebni mesned-i sadâret, sadâkât ve ehliyetinize binâen
2- ‘Uhdenize ve mesned-i meşihat dahi Rum ili kâdı‘askeri Ziya'eddin efendi uhdesine ihale
3- ve tevcih kılınmağla diğer vükelanın bi'l- intihab me'muriyetleri icra olunmak üzere ‘arzı ve kanun-ı
4- (Kânun) -ı Esâsînin muhafazası ve memleketin idame-i asayiş ve emniyeti ve devlet-i ‘aliyye ve memalik-i şahanemizin
5- ‘Umran ve terakkîsi ve kâffe-i teba‘amızın sa‘âdet-i hal ü refahı esbabının istikmâli nezdimizde
6- Begâyet-i mültezem olduğundan ana göre sarf-ı mesa‘i ve gayret olunması matlûb-ı kat‘î-i
7- Şahanemizdir. Cenab-ı Hakk tevfikât-ı ilâhiyyesine mazhar buyursun. (Amin)

fi 22 Muharrem sene 1327

Abdülhamid

Arşiv Okumaları 150

Vezir-i fetanet-semirim Kamil Paşa
Hariciye Nazırı Fuad Paşa fetanet ve dirayetle muttasıf vükelâ-yı devlet-i aliyemizden olduğundan mesned-i sadaretin müşarünileyh ve Hariciye Nezâretinin  dahi malumât ve rûyeti cihetiyle Âli Paşa'ya  tevcihi ve ihâlesi nezdimizde bi't tensib müşarünileyh Fuad Paşa'nın uhdesinde bulunan me'muriyet-i mahsusayı şimdilik oraca bir münasib zata ihale ederek avdet eylemesi tarafına bildirilmiş ve  sadaret kaim-makamlığı dahi müsellem olan gayret ve sadakatine mebni uhde-i rü'yetine tevcih kılınmışdır müşarun-ileyhin avdetine kadar sair vükela-yı devlet-i aliyemizle bi'l ittifak ifâ-yı me'muriete sarf-ı makderet eyleyesin. Hakk Teala Hazretleri cümleyi muvaffak buyura . Âmin.
fi 19 CA sene 1278

Arşiv Okumaları 149

‘Atufetlü efendim hazretleri
1-İzmir'de tab‘ ve neşr edilmekde olan Âhenk Gazetesi'yle matba‘asının hukuk-ı imtiyaziyesini Ali Nazmi efendiye terk ü ferag eylediğinden mu‘amelat-ı lazımesinin ifası
2- Mezkûr gazete sahib-i imtiyazı İsma‘il Sıdkı efendi tarafından istid‘a edilmiş ve muma-ileyh Ali Nazmi efendi hüsn-i hal ashabından olub kefalet-i kaviyyeye rabt ile
3- ‘Ale'l-usul kendisinden sened alındığı iş‘âr-ı mahalliyeden anlaşılub suret-i iş‘âr muvafık-ı usûl ve emsal bulunmuş olduğuna dair Matbu‘at-ı Dahiliye idaresinden
4-Verilen tezkirenin lefiyyle icra-yı icabını havi ve Dahiliye Nezaret-i celilesinin tezkiresi 9 Zilka‘de sene (1) 316 tarihinde ‘arz-ı huzur-ı ‘âli kılınmışdı. te'kid keyfiyeti
5- Mutazammın nezaret-i müşarün-ileyhden bu kere varid olan tezkire melfufuyla ‘arz ve takdim olunmağla ol babda her ne vecihle irade-i seniyye-i cenab-ı hilafetpenahi müte‘allik
6- Ve şerefsudur buyurulur ise mantuk-ı münifi infaz eyleyeceği beyanıyla tezkire-i senaveri terkim kılındı efendim.

Sadrazam
Rıf'at

1- Maruz-ı çaker-i kemineleridir ki
2- reside-i dest-i tazim olub melfufuyla manzur-ı ali buyrulan iş bu tezkire-i samiye-i sadaretpenahileri
2- üzerine mucebince irade-i seniyye-i cenab-ı hilafetpenahi şeref müteallik buyrulmuş olmağla ol bab da emr ü ferman
3- hazret-i veliyül emrindir.
fi 15 receb sene 317  fi 7 teşrinisani sene 315
Serkatib-i hazret-i şehriyari
bende
Tahsin

Arşiv Okumaları 148

şerîat meâb ismail kazası naibi efendi zide ilmühü ve kıdvetü'l-emacid ve'l-a'yan dergah-ı ali kapucubaşılarından hala ismail geçdi mütevellisi abdul ağa zide mecdehü ve kıdvetü'l-emâsil ve'l-akrân hassa-i hasekilerinden mübaşeret ile hala oltarafta olan ali haseki zide kadruhu ve ba'desselam inha olunur ki ismail menzilcisi emrullah çelebi dimekle ma'ruf kimesnenin sabikan surre emini müteveffa haci hasanin zimmetinden bar-gir bahasindan emr-i âliden beyan olunduğu  vecihle ikiyüz guruş alacağı  kaldığı senki efendi-i muma ileyhasin bu def'a tarafindan derssaadete arz-ı birle inha ve meblağ-ı mezbur müteveffa-yı merkumun zimmetinden tahsil olunan akçeden i'ta oluması istid'a olunmağla  imdi merkum Emrullah'ın matlubu olan meblağ-ı mezbur müteveffa-yı merkumun zimmetinde kaldığı şer'an sabit ve zahir olur ise siz ki ağa ve haseki-i muma-ileyhimasız ma'rifetiniz ile müteveffa-yı merkumun zimem-i sa'iresinden tahsil ve merkum Emrullah'a eda itdirdikten sonra taraf-ı şer'den hüccet ahz ve Der-sa'adet'e irsale mezid-i ihtimam ve dikkat eylemeniz babında sadır olan ferman-ı alişan mucebince mektub tahrir ve (boşluk)  ile irsal olunmuşdur inşaallahu te'ala vusulünde muceb-i emr-i ali üzre amel ve hareket ve hilafından hazer ve mücanebet eyleyesiz ve's-selam

Not: Bu metin Osmanlıca Tarih Edebiyat grup üyeleri tarafından çevrilmiştir.

Gruba ulaşma linki

Arşiv Okumaları / 147

Darbhane-i amire defterdarı müşir-i mükerrem atufetlü efendi hazretleri
Müderrisin-i kiramdan olup huzur-ı lamiü'n-nur-ı hazret-i şahanede kıraatı muattal olan tefsir-i şerif dersine memur hoca efendilerden enderun-ı hümayundan mahrec aziz efendiye tekaüd olmak şartıyla emtia gümrüğünden beşyüz ve Silivri vücuhundan olup bundan akdemce vefat eden numan ağanın mahdumu ismail şayeste-i atıfet-i seniyye olduğundan hazine-i amireden ikiyüz kuruş maaş tahsisi hususuna irade-i seniyye müteallik buyurulmuş olmağla mucibince senedlerinin tanzim ve bab-ı aliye serian takdimine himmet buyuralar deyü buyuruldu
fi 17 L. (Şevval) sene (12)52

Arşiv Okumaları / 146

1
Eazım-ı vükelâ-yı fiham-ı saltanat-ı seniyyemizden Adliye Nazırı düstur-ı mükerrem müşir-i müfahham nizamü'l-âlem Vezir-i dirayet-semirim Cevdet Paşa edamalluhu teâlâ iclânın fitrat-ı asliyesinde merkûz ve mermûz olan

2
gevher-i [ gûher ] giran-beha-yı hamiyet ve gayret-i kâmile ve mâye-i makbul-i dirâyet ve sadakat-ı bâhire iktizâsınca  şimdiye değin mahsül-i uhde-i ehliyeti olan hutub-ı cesime-idevlet-i aliyemde ibrâz ve izhâriyet ile

3
mesâi-i cemile ve hidemât-ı ber-güzidesi nezd-i mekârim-vefr-i şehriyârânemde rehn-i sipâs ve tahsin olarak hakkında ber-kemâl olan teveccühât celile-i tâcidârânemin nişâne-i mahsusı olmak üzere

4
bu kere müetalik ve şeref-sâdır olan emr ü ferman-ı meali-unvân-ı pâdişâhânem mucebince müşarü'n-ileyhin kerimesi fahrü'l-muhadârât Aliye Fatma Hanım zîdet iffetuhâya şefkat-nişân-ı hümâyûnımın ikinci rütbesinden bir kıt'ası

5
ihsan kılınmış olduğunu mutazammın iş bu berat-ı alişanım tasdir olundu hurrira fi'l-yevmi'l-hâmis min şehr-i şevvâli'l-mükerram lisene salis ve  selase miete ve elf (5 şevval 1303)

Arşiv Okumaları / 145

Numara: 9
Karargâh
16-2-(13)32

Hû 
18. Kolordu Kumandanlığına

Orduma:
Arslanlar;
1-Bugün Türklere şan İngilizlere kara meydan olan şu kızgın toprağın müşemmes semasında şühedamızın ruhları şad ü handan pervaz ederken ben de hepinizin pak ve temiz alınlarından öperek cümlenizi tebrik ederim.
2- Bize ikiyüz seneden beri tarihimizde okunmayan bir vakayı kaydettiren Cenab-ı Allah'a hamd ve şükür eyleyelim.
Allah’ın azametine bakınız ki, bin beş yüz senelik İngiliz Devleti’nin tarihine bu vak'ayı ilk defa yazdıran Türk süngüsü oldu. İki seneden beri devam eyleyen Cihan harbi böyle parlak bir vak'a gösteremedi.
3- Ordum gerek Kut karşısında ve gerekse Kut’u kurtarmaya gelen İngilizler karşısında şehit ve mecruh olarak üç yüzü mütecaviz zabitle on bin neferini gaib eyledi. Fakat buna mukabil bugün Kut’dan beş general olmak üzere dört yüz seksen bir zabitle cem'an on üç bin üç yüz neferlik ingiliz ordusunu teslim alıyoruz. Bu teslim aldığımız orduyu kurtarmaya gelen İngiliz ordusuna da bugüne kadar  otuz bin zayiat verdirdik.
4- Şu iki yeküne sathi bir nazar atf edilince cihanı hayretlere düşürecek büyük bir fark görülecek ve tarih bu vak'ayı yazacak kelime bulmakta müşkilata uğrayacaktır.
5- İşte Türk sebatının İngiliz inadını kırdığını bu harbde birinci defada Çanakkale’de, ikinci defada burada görüyoruz.
6- Yalnız süngü ve göğsümüzle kazandığımız bu zafer yeni tekemmül eylemekde bulunan vesait-i harbiyemiz karşısında atideki muvaffakiyatımıze parlak [beşaret] olacağına kat'i bir delildir.
7- Bu günün ismine Kut Bayramı  namını veriyorum. Umum ordumun kıtaatı, her sene bu günü tes'îd ederken şehitlerimize yasinler, tebarekeler, fatihalar okuyacaktır. Şühedamız, cennat-ı ulyasında, semevatta kızıl kanlar ile pervaz ederken, gazilerimiz de atideki zaferlerimize nigehban olsunlar:

Altıncı Ordu Kumandan Vekili
Mirliva Halil

Not: Bu belge Osmanlıca Tarih Edebiyat grubu üyeleri tarafından çevrilmiştir.

Osmanlıca Tarih Edebiyat grubuna ulaşma linki

Zafer Şık
Osmanlı Türkçesi Arşiv Uzmanı
.

Arşiv Okumaları / 144

Veliy-i Nimet Efendim;
Şu mektubumu size hastaneden kemal-i teessür ve mateme bürünmüş olduğum halde karalamaya mecbur oluyorum. Şuanda duyduğum tahassüsatım beni her nevi hüzünlere gark ediyor ve ağlamak için kalemde katre katre toplanan yaşların her halde gözümden boşanmasını istiyorum. Filhakika bunu istemekte çok geçmiyor ve bu saika-i melal için için ağlıyorum. Teessür durumunu bu suretle tadile kısmen muvaffak oluyorum. Va esefa ki… Mazinin avdet etmemesi kadar nazarımda uzak görünen hayalatım “şehit kardeşimin, sevgili kardeşim Mehmet Şevketin” al kanlar içinde uykuya dalan vücudunu temsil ediyor. Onun artık hayatının bu dünyadan nasipdar olmadığını irae ediyordu. Eyvah! Ne derin ebedi bir uyku! Safha-i şebabının ilk demlerine ilk adımını koymaya başlamış… bir biraderimin bu alemden artık uful ettiğini gördüğümden dolayı onun arkasından koşmak istiyorum. Ona peyrev olmak istiyorum ve kendisine yetişmek hakkına malik olamadığımdan kendime sitemler ediyorum. O şehid biraderim nasıl ki topraklar altında ihtimal çürümüş de kokusu gelmiş validesinin ağuşuna atlamakta tereddüt etmediyse ben de bu nevnihal  vatanın arkasından gitmek veyahut ona peyşu olmaya azm etmeliydim. Kabri rahmet-i rahman olan müteveffaya validemin elini uzatarak ancak on sene sonra kendi yanına birlikte uyumaya almış olduğu küçük yavrucağına gösterdiği şefkati bana göstermediği için cidden meyus, şimdi hakikaten nalanım. Ben de bunlarla birlikte ebedi hob alude

Arşiv Okumaları / 143

Hû

Bitlis vilayetinden dahiliye nezaretine varid olan şifre telgrafname suretidir.

C. 26 teşrin-i sani sene 316 tastanlı nezdinde zuhur eden mektub hurufat-ı Osmaniye ile muharer ise de
buraca bilinir bir lisan yazılı olmadığından münderecatın şifreli İLE arzı mümkün olamadı aslı posta ile takdim olunmak üzere emr-i alî-i daverîleri muntazırdır merkum ise TAHT-I tevkifde bulunduğu maruzdur.
fi 27 teşrin-i sani sene 316

Bitlis valisi hüsni
Hâlâ

Not: Bu belge Osmanlıca Tarih Edebiyat grubu üyeleri tarafından çevrilmiştir.

Osmanlıca Tarih Edebiyat grubuna ulaşma linki

Zafer Şık
Osmanlı Türkçesi Arşiv Uzmanı

Arşiv Okumaları / 142

Maliye nezaretine
ordu ve canik kazaları a'şarının ne suretle ihalesi icra olunacağı ifadesini ve gümüşhane ve karahisar sancakları a'şarının dahi marifetiyle tesviyyesi istizanını havi trabzon defterdarı saadetlü bey tarafından varid olan bir kıta tahrirat meclis-i valaya i'ta ile kıraat olunmuş ve suret-i iş'ara nazaran bu babda olan re'y-i devletlerinin istifsarı lazım gelerek manzur-ı valaları buyrulmak üzere tahrirat-ı mezkure leffen gönderilmiş olmağla bi'l-mütalaa ol-babda re'y-i samilerinin iş'arı mütevakkıf-ı himem-i behiyyeleridir.

Osmanlıca Tarih Edebiyat grubuna ulaşma linki

Arşiv Okumaları / 141

Trabzon eyaleti dahilinde  gümüşhane ahalisinden TARİKAT-İ aliyye-i KÂDRİYYEDEN salih babanın alil olarak emr-i taayyüşde zaruret çekmekde olduğundan merhameten yevmiyye iki vukIYye nan-ı aziz TAYİNiçün tahrirat-ı tasdiri istid'asına DAİR takdim eylediği arzuhal  meclis-i valaya  bi'l-i'ta KIRAET olunarak manzur-ı atufileri olmak üzere leffen gönderilmiş OLDUĞU  beyanıyla TEZKERE

Arşiv Okumaları / 140

sadır olan ferman-ı alilerine imtisalen Beyoğlunda topçu kışlası pişgahında manzur-ı hazret-i cihandari buyurulub hedmine irade-i aliyye tealluk iden çend kıt'a
sütun  nasbiyle dâiren-madar divar ve civârında iki bab hânenin mahalline varıldıkda bundan undan akdem ba-irâde-i seniyye hedm olunan Eniştaş hânesinin ebniye ve ahcarından
eser-i bina na-bud ve arsası tarla olmuş olduğu ve zikr olunan hane-i mehdumeden yüzer zira' mikdarı bu'd mesafede endaze oğlu Kiğork bundan SEKİZ MAH mukaddem
on üç kıt'a temel sütunu vaz' ve üzerine fakat taban KEŞİDesiyle etraf U erba'asının Divârını inşâ edip ŞİTA duhülünde ALA HALİHİ terk eylediği ve mersum
KİĞork dahi Nemçeli teb'asından idüğü ihbar olunduğu ve civarında iki bab hânenin biri Ermeni tâifesinden ikinci NikoGOs  zİMMİNİN ve DİĞERİ  sarraf
Tanagar oğlu Kirhork tarafından inşâ etdirdiği MENZİL olduğu tashîh olunduğu ma'lûm-I DEVLETLERİ buyuruldukda emr-u ferman devletlu inâyetlü sultanım hazretlerinindir.

Arşiv Okumaları / 139

Sahh
Seddü'l-bahr Dizdarı 
Osman nam müfsid ve müzevvir bu tarafda güna gun hile ve tezviratta bulunmaktan naşi nefyi ve te'dibi la-büdd ve muktezi olmağla müfsid-i mezbur ba-ferman-ı ali ta'yin olunan çavuş mübaşeretiyle seddü'l-bahr kal'asına ıslah-ı nefs edinceye dek kal'abendiyçün hüküm
buyuruldu
fi 16 za sene 84

Not: Bu belge Osmanlıca Tarih Edebiyat grubu üyeleri tarafından çevrilmiştir.

Osmanlıca Tarih Edebiyat grubuna ulaşma linki

Arşiv Okumaları / 138

Şevketlü kerametlü mehabetlü kudretlü veli-ni'metim efendim
Valid-i macid-i kesiru'l-mahamidleri cennet-mekan firdevs-i aşiyan merhum sultan Abdulhamid han efendimizin evkafı mukata'atından Mora ceziresinde  vakı' Balya badra mukata'ası hin-i vakfiyetden beru ba-hatt-ı hümâyûn-ı şevket-makrun serbest olub cemi' tekalifden mu'af iken ikiyüz yedi tarihinde  mu'afiyet kaydı ba-hatt-ı hümayun terkin olunarak mu'af ve ğayr-ı muaf siyyan olarak  tekalif i'ta eylemeleri babında mu'ahharan emr-i ali sadır olmuş ise de mukata'a-i mezkurenin mu'afiyyeti muhdes olmayub ahalisi yedlerinde hutut-ı hümayun ile müveşşeh evamir-i aliyye mevcud olmağla kadimi üzere evamir-i aliyye-i mezkurenin tecdidi ahali tarafından ba arz ve mahzar istid'a olunmuş olduğunu mütevelli-i vakf ba-takrir inha itmekle kuyud-i lazimesi ba'de'l-ihrac keyfiyyeti mora nizamı vikayesine me'mur Azmi efendi kullarından isti'lam olundukda mukata'a-i merkume fi'l-asl serbest  olan mukata'atdan değil ise de hîn-i vakfiyette mu'afiyet üzere kayd olunmuş olmakdan naşi ber-vech-i istid'a serbestiyet-i muafiyetlerinin ibkası hususunu re'y-i aliye havale ile i'lam eylediği manzur-ı şahaneleri buyrulmak içün ma'ruz-ı atebe-i  ulya-yı mülükaneleri kılındığı muhat-ı ilm-i alileri buyruldukta emr u ferman şevketlü kerametlü mehabetlü kudretlü veli-ni'metim efendim padişahım hazretlerinindir

Manzurum olmuştur mukata'anın serbest ve mu'âfiyetinde vakfa faide yoktur şimdi bunun sırası değildir. 

Arşiv Okumaları / 137

izzetlü defterdar efendi zikrolunan dükkanların gedik kaydıçün verilen ferman-ı ali şer' ve kanuna mugayir olduğu ve emr-i mezkur kaydı terkin ve gedik dahi fesh olunmak iktiza eylediği me'al-İ  i'lamdan müsteban olmağla i'lam-ı mezkur ve arz-ı hal VE DERKENAR MAZMUNLARINA DİKKAT ve iktizasını i'lama mübaderet eyleyesin DEYU BUYURULDU Fİ 25 ZA SENE 225

Not: Bu belge Osmanlıca Tarih Edebiyat grubu üyeleri tarafından çevrilmiştir.

Osmanlıca Tarih Edebiyat grubuna ulaşma linki

Arşiv Okumaları / 136

Şeyhulislam-ı esbak merhum Mekkî Efendinin halîlesi Havva Hanım ile el-Hâc Mehmed Emin nam kimesnenin bi'l- icareteyn mutasarrıf oldukları Mahmud Paşa Hammamı kurbunda kâin beş bab attar ve boncukcu dükkanlarının gedik niza'ına dair takdim-i huzur-ı âlîleri kılınan arz-ı hallerine divan-ı hümayundan verilen emr-i şerif-i âlî-şân kaydı sual ve ihrac ile mukteza-yı şer'isi faziletlü İstanbul kadısı efendi da'ilerinden isti'lam buyrulub muma-ileyh da'ileri tarafından dahi mukteza-yı Şer'îsi i'lâm olundukdan sonra iktiza-yı nizamına mübaderet olunması hususu ferman-ı âlîleriyle havale buyrulmuş olub ancak husus-ı mezbur miriye dair mevaddan olmayub umûr-i DİVANİYYEDEN  idüğü ma'lum-I devletleri buyruldukda emr u ferman devletlü sa'adetlü sultanım hazretlerinindir.

Not: Bu belge Osmanlıca Tarih Edebiyat grubu üyeleri tarafından çevrilmiştir.
Osmanlıca Tarih Edebiyat grubuna ulaşma linki

Arşiv Okumaları / 135

midilli adasının yunanlılar tarafından işgali üzerine muallimlikle bulunduğu efteron karyesinde çete teşkil ederek icra-yı vahşet ve irtikab-ı cinayette bulunmak maddelerinden dolayı ahz u girift olunarak İzmir Divan-ı Harb-i Örfisinde muhakemesi icra kılınan teb'a-i devlet-i aliyyemden işçi Mihal oğlu Tire'li Nikolo'nun Yunan askerinin Midilli ceziresini işgali üzerine vazife-i  tedrisi terk ve çete kıyafeti iktisâ ve çete riyasetini deruhte iderek Yunanlılarla birlikde hükumet-i seniyyem aleyhine silah isti'mal itdiği Helvacı Ahmed ile refikasını cerh ve katl ve Ahmed'in kerimesinin cebren bikrini izale ve yağmagirliğe ictisar eylediği maa'l-kasem  istima' kılınan şuhud-ı müteaddidenin ihbârât ve şehâdâtı ve merkumun üzerinde zuhur iden mektub ve evrak Münderecatı ve eşyası meyanında bulunup mal-ı mağsub olduğu tahakkuk eden eşyanın hamili bulunmasi ve yine eşya meyanında bulunan saçların mağdure mahzurat-ı İslamiyyeye aid bulunması anlaşılması delaletiyle sabit olduğundan merkumun o vechile mücrimiyyetine ve ceza kanunnamesinin kırk sekizinci hükmüne tevfikan i'damına karar verildiği ve Divan-ı Harb-i mezkurdan tanzim olunub huzur-ı şâhâneme arz ve takdim kılınan mazbatada gösterilmiş olmağla icrası hususuna irade-i seniyye-i mülukanem mehabet-riz-i sünuh ve sudur olmuştur imdi sen ki Sadr-ı a'zam ve harbiyye düstur-ı ekrem ve muazzam müşir-i efham ve muhterem nizamü'l-alem yaver-i ekremim mahmud Şevket paşa Edamallahu teala iclaluhi ve za'if-i bi't-te'yid-i iktidaruhu ve ikbaluhusun merkum hakkında la-hakk olan hükmü icra etdiresin. Tahrîran fi’l-yevmi’l-âşir min şehr-i rebi'ü'l-ahir li-sene ihda selasun ve selase mie ve elf.

Not: Bu belge Osmanlıca Tarih Edebiyat grubu üyeleri tarafından çevrilmiştir.

Osmanlıca Tarih Edebiyat grubuna ulaşma linki