Arşiv Okumaları / 125

Şevketlü kerametlü mehabetlü kudretlü velî-ni'metim efendim Selanik mutasarrıfı Mehmed Paşa kullarının Taşoz ve Ayneroz sularında geşt ü güzar üzre olan sefineleri işkıya teknelerine tesadüf ile bi'l muharebe

Bazı arma sakatlığı olmuş ise de sahil-i selamete çıkmış oldukları havadisine dair Çayağzı muhafızı İbrahim Paşa bendeleri tarafından vürûd edüb sürh işaretiyle takdim-i hâk-i pâ-yı hümayun-i mülûkâneleri kılınan şukka balasına şeref-efza-yı sudûr olan hatt-ı hümayun-i şevket-makrun-i şahanelerinin 

 Bir fıkra-i münifesinde Selanik mutasarrıfı müşarun-ileyhin sefaini ne mikdardır andan bahs olunmuyor deyü emr u ferman buyrulmuş olmağla vakıan sefayin-i mezkurenin mikdar u kemiyyeti inha olunmamış olub halbuki sevahil-i merkumede geşt ü güzar üzre olduklarından eşkıya teknelerine tesadüf eylediklerinde mukavemet 
 Edecek derecede midir değil midir bilinmek içün mikdar u keyfiyyeti kapukethudası Necib Efendi kullarından sual olundukda müşarun-ileyhin sefayin-i mevcudesi altı kıt'a olub bir kıt'ası ingilterelüden iştira olunmuş üç direkli kebirce sefine ve iki kıt'ası ikişer direkli brik ve bir kıt'ası çekdiri ve iki kıt'ası

 İkişer toplu şalupa resminde olduğunu ifade etmiş olmağla mücerred malum-i hümayun-i cihan-banileri buyrulmak içün arz u iş'âra ictisar kılındığı rehin-i ilm-i âlîleri buyruldukda emr u ferman şevketlü kerametlü mehabetlü kudretlü velî-ni'metim efendim padişahım hazretlerinindir 
 Benim vezirim
 işbu takririn malum-i hümayunum olmuşdur Selanik mutasarrıfı müşarun-ileyhin sefaininin mikdarı altı kıtadan ibaret imiş üzerlerine gelen eşkıya tekneleri yirmi beş kadar olduğu müşarun-ileyh İbrahim Paşanın gönderdiği havadise dair şukkada muharrer idi mutasarrıf-ı müşarun-ileyh kapu kethudan Necib efendi tarafından mevcud olan sefainden ma'da biraz sefain dahi tedarik eylemesi bugünlerde mümkün ise teksirlerine ikdam etmesi tahrir olunub bakalım müşarun-ileyh tarafından ne vechle cevab gelür 

Not : Bu belge Osmanlıca Tarih Edebiyat grubu üyeleri tarafından çevrilmiştir.

Osmanlıca Tarih Edebiyat grubuna ulaşma linki

Arşiv Okumaları / 124

Şevketlü kerametlü mehabetlü kudretlü velî-ni'metim efendim
Malum-i mekarim-melzum-i padişahileri buyrulduğu üzre çâker-i sadakat-perverleri mukaddema Belgradda iken hidemat-ı cihadiyyede müstahdem vüzera

 Ve mîr-i mîrân ve sair sergerdegâna iksa ve i'tâ olunmak üzre Dersaadetlerinden celb olunmuş olan semur kürekler ve çelenklerden iktiza edenlere ilbas ve i'tâ olundukdan sonra kırk sevb bölüklü semur kürk ile ortası a'lâ taşlı yedişer kollu yirmi beş 
 Ve yine ortası taşlı beşer kollu on beş kıt'a altun çelenk fazla olarak nezd-i çâkerîde kalmış olduğundan zikrolunan ferve ve çelenklerin kangı tarafa teslimi hususuna irade-i seniyye-i mülûkâneleri taalluk eder ise manut-ı re'y-i derin-i keramet-karin-i şahaneleri idüğü 
 Muhat-ı ilm-i gîtî-şümûl-i tacdarileri buyruldukda emr u ferman şevketlü kerametlü mehabetlü kudretlü velî-ni'metim efendim padişahım hazretlerinindir

 Benim vezirim çelenkler darbhane-i âmireme teslim olunub kürkler dahi mukaddem hazinedarbaşıdan kaçar guruş fiyat ile alınmış ise yine o fiyat üzre muma-ileyhin matlubuna mahsuben kendüye verilüb mahsub olmasını defterdara havale eyleyesin



Not : Bu belge Osmanlıca Tarih Edebiyat grubu üyeleri tarafından çevrilmiştir.

Osmanlıca Tarih Edebiyat grubuna ulaşma linki

Arşiv Okumaları / 123

şevketlü kerametlü mehabetlü kudretlü velî-ni'metim efendim
Viranşehir kazasında Kapucular karyesinde medfun kutbü'l ârifîn Hazret-i Akşemseddin kuddise sirruhu'l-azizin kapucular ve diğer kapucular Ömer-ömr

 Karyeleri tekye ve türbe ve imareti vakfından olmak hasebiyle bi'l cümle tekalif-i vârideden muafiyyetlerini mübeyyin mukaddemen yedlerine verilen emr-i şerifin bu defa tahriri zaviyedarı tarafından bâ-arz-ı hal inha ve istida olunmağla verilen ferman kaydı lede's-sual karyeteyn-i mezkureteyn ahalisi

 Aziz-i müşarun-ileyh hazretlerinin tekyesine zaviyedar kaydolunmuş ve ol vechle tekalif-i varideden muafiyyetlerini havi iki yüz yirmi üç senesinde tecdiden yedlerine emr-i şerif verilmiş olduğu ve bu makule muafiyyet emirlerinin tecdidi hâk-i pâ-yi hümayunlarından arz u istizana mütevakkıf idüğü

Kuyuddan müsteban olmağla manzur-ı me'âlî-mevfur-i şahaneleri buyrulmak içün arz-ı hal-i mezkur maruz-ı huzur-ı me'âlî-mevfur-i cihan-banileri kılındığı muhat-ı ilm-i âlîleri buyruldukda emr u ferman şevketlü kerametlü mehabetlü kudretlü velî-ni'metim efendim padişahım hazretlerinindir

Benim vezirim yedlerinde olan emr-i âlî mucebince tecdiden emir verile

Not : Bu belge Osmanlıca Tarih Edebiyat grubu üyeleri tarafından çevrilmiştir.

Osmanlıca Tarih Edebiyat grubuna ulaşma linki

Arşiv Okumaları / 122

Şevketlü kerametlü mehabetlü kudretlü velî-ni'metim efendim 
Bundan mukaddemce Hanya ve Resmo Sancakları tevcih ve ihsan buyrulan sadr-ı esbak İbrahim Hilmi Paşa kullarının vârid olan tahriratında mukteza-yı

 Memuriyyeti üzre savb-ı memurîne âzim olmuş ise de mansıbına bahren azimet icab eylediğinden bi'l cümle etbâ' ve hayvanat ve sair levazımatın terkine muhtac olacağı beyanıyla mansıb-ı mezkurdan dûn bir âhâr mansıb tevcih ve ihsan buyrulmasına izhar-ı hüsn-i rıza ve işbu iltiması 
 karin-i müsa'afe buyurulmadığı takdirce irade buyurulacak bir iskeleye çend kıt'a sefayin-i miriyye ta'yin ve irsal olunmasını tahrir ve inha itmiş olduğundan tahrirat-ı mezkure  manzur-ı mekarim-mevfur-i şahaneleri buyurulmak içün hülasasıyla ma'an merfu'-i 'atebe-i bülend-mertebe-i mülukaneleri

 Kılındığı muhat-ı ilm-i âlîleri buyruldukda ne vechle irade-i seniyye-i husrevâneleri erzanî buyrulur ise emr u ferman şevketlü kerametlü mehabetlü kudretlü velî-ni'metim efendim padişahım hazretlerinindir

Bu madde sadr-ı a'zamImın re'yine ihale olmakla tahrirat-ı varideyi makam-ı  sadarete isal edesin

Not :  Bu belge Osmanlıca Tarih Edebiyat grubu üyeleri tarafından çevrilmiştir.

Osmanlıca Tarih Edebiyat grubuna ulaşma linki

Arşiv Okumaları / 121

Devletlü efendim hazretleri
Cennet-mekan pertevniyal valide sultan hazretleri evkaf-ı şerifesinin icâre-i vahidelü  akaratından Üsküdarda paşa limanında olub mukaddema muhterık olan dakik vapur değirmeninin inşaasına muktezi beş-altı bin altunun sarfına vakfın tahammülü olmamasından ve bu cihetle bedel-i icârdan vakfın istifadesi münkati' olmasından nâşi mezbur değirmanın inşası içün talib-i taharri olunarak ol babda tanzim olunan harita ve resmi mucebince beşbinbeşyüz altun sarfıyla on mah zarfında inşa ve ikmali idilmek ve onbirinci aydan itibaren değirman içün canib-i vakfa şehri yüz lira bedel icar takdiriyle bunun üç rub'ı masarıf-i inşaiyeye mukabil müteahhide terk ve diğer bir rub'ı taraf-ı vakıfdan ahz olunmak ve bu suretle masarif-i inşaiyeyi altı sene zarfında bedel-i icardan bi'l- istifa hitam-ı müddetde değirman canib-i vakfa terk ve teslim kılımak şartıyla yunan devleti tebe'asından mösyö Nikforaki ile tanzim olunan mukavelename müsveddesinin müteferriatıyla gönderildiği beyanıyla icra-yı icabı zımnında taleb-i mezuniyyetini havi  varid olan tezkire-i devletleri meclis-i mahsus-ı vükela kararıyla ledi'l- 'arz vakfa bir gün zarar ve ziyan tertib itmemek içün mukavelenamenin her türlü kuyud-i lazimeyi cami' olmasına fevkal'ade i'tina ve dikkat olunmak şartıyla icra-yı icabına irade-i seniyye-i cenab-ı padişahi müteaallık ve şeref-sudur buyurulmuş ve mezkur mukavelenamenin sureti ile defatir ve sened ve resim ve harita leffen irsal kılınmış olmağla ber-mantuk emr-i ferman-i hümayun icabının icrasına himmet buyurulması  siyakında  tezkire-i senaveri terkim kılına efendim
fi 23 Rebiul ahir 1306
ve fi 15 kanun-i evvel sene 1304

sadra'zam
Kamil

Not : Bu belge Osmanlıca Tarih Edebiyat grubu üyeleri tarafından çevrilmiştir.

Zafer Şık
Osmanlı Türkçesi Arşiv Uzmanı

Osmanlıca Tarih Edebiyat grubuna ulaşma linki

Arşiv Okumaları / 120

Hazine-i evrak müdiri izzetlü bey efendi
Sâye-i şevketvâye-yi hazret-i şâhânede Hazîne-i Evrakın sûret-i idâresiyle bazı nâkıs olan şeylerin ikmâline Dair çend-bendi mutazammın takdîm kılnan takririniz ile evrâk mahfazalarının üzerine konılacak numero ve iktiza itdikce ALINACAK evrak İÇUN verilecek pusula numUNESİ meclis-i valaya verilerek OL-BABDA  cereyan iden müzakerede Mezkûr takrîrin ihrâc itdirilerek suretinin bendleri bâlâlarına sürhle terkîm ve işaret olduğundan ol-vechile icra-yı icabının hâk-pâ-yı hümayun-ı hazret-i mülûkânede bi'l-istizan irade-i seniyye-i cenâb-ı pâdişâhi dahi ol-merkezde Müteallik ve şeref-sudûr buyrulmak mûcebince icâb iden keyfiyyet Mâliye Nezâret-i Celîlesiyle gümrükci sefâletlü Hacı Hüsam Efendiye bildirilmiş ve zikr olunan takrîrin bir kıt'a sureti ile numûneler merbûtan gönderilmiş olmağla emr u ferman-ı hümayun-I hazret-i şahane-mantuk-i alisi ve SÜRHDE gösterildiği vechile iktizalarına hüsn-i İCRASINA DAİR HİMMET EYLEYESİZ DEYU BUYURULDU
FÎ SELH-İ CA. SENE (12)70

Not: Bu belge Osmanlıca Tarih Edebiyat grubu üyeleri tarafından çevrilmiştir.

Zafer Şık
Osmanlı Türkçesi Arşiv Uzmanı

Osmanlıca Tarih Edebiyat grubuna ulaşma linki

Arşiv Okumaları / 119

''İzn-i Hümayunum olmuştur"

Arz bende-i bi-mikdar oldur ki  şevketlü kerametlü mehabetlü kudretlü veliyy-i ni'metim efendim Padişahım
Alaçam kazası muzafatı kuralarından Mülküc nam karyede vaki salat-ı Cum'a ve 'îdeyn olunur Cami-i şerif olmadığından ashab-ı hayrattan Molla Hüseyin nam kimesne müceddeden mescidi bina ve  minber-i  va’z  ve ikameti salat-ı cum’a ve 'îdeyne izni hümayunları erzanı ve ber-vech-i  hasbi hitabeti dahi erbab-ı istihkâkdan Hüseyin Halifeye sadaka buyurulmak ricasına Alaçam Naibi arz itmekle balası izn-i hümayunum olmuştur deyu Hatt-ı Hümayun-ı inayet-makrunlarıyla tezyin buyurulmak babında emr-ü ferman şevketlü kerametlü mehabetlü kudretlü veliyy-i ni'metim efendim Padişahımındır.

Arşiv Okumaları / 118

Şevketlü kerametlü mehabetlü kudretlü veli- ni'metim efendim 
Yenikapu haricinde kâin kibar-ı meşayih-i kiramdan Merkez Efendi kaddesallâhu sirruhü'l- azîz tekyesi şeyhi Ahmed Efendi da'ileri ve sa'ir fukara ve dervişan Bab-ı alilerine bir kıt'a arz-ı hal takdimiyle me'alinde İstanbul Gümrüğü  malından ba-mukabele-i nan yevmi yüz yirmi sağ akçeye mutasarrıf ve tekye-i mezkurede sakin sıgalı Aşık Hasan bi-lâ veled fevt olmuş olduğundan vazife-i mezkure mahlulünden tekye-i merkume fukarasına ayende vü revendegan ve acezeye nan-ı aziz bahası olmak üzre sadaka vü ihsân buyrulmasını niyaz ve istid'a etmiş ve kaydı ve şürût-i lazımesi ba'de'l-ihrac muktezası lede's-sual bu misillü emvâl-i mukata'at-ı miriyyeden vezayife mutasarrıf olanlardan biri fevt oldukda evlad ve zevce ve vâlideynine nısfı ve ecnebiye ikişer akçe ihbariyyesi tevcih ve kusuru hazine-mande olunmak şürutundan olub ancak istid'a olunduğu vechile tanzimi mücerred irade-i seniyye ve mübarek hatt-ı hümayun-ı inayet-makrun-i şahaneleri sünuh ve suduruna muhtac olduğu der-kenar olunmuş olmağla manzur-ı me'ali-mevfur-ı mülukaneleri buyrulmak içün arz u takdim kılınmağın tekye-i mezkure şeyh ve fukarasının istid'a ve niyazları hususunda ne vechle irade-i mekarim-ade-i cihanbanileri sünuh ve sudur buyrulur ise emr u ferman şevketlü kerametlü mehabetlü kudretlü velî ni'metim efendim padişahım hazretlerinindir

Benim vezirim
Bu misillu şeylere müsa'ade iktiza etmez şurut mucibince hazine-mande oluna

Arşiv Okumaları / 117

Hû

Benim vezîrim
bu tarafa celbi ve türbe‑i cedîdenin bir mahallinde vaz‘an ziyaretgâhı olmak nezdinizde münâsib ise getürdesiz değil ise yine Şâm‑ı Şerîf’de merkad‑i Yahya Aleyhisselâm’da vaz‘ ne vechile münâsib görünür ise yine taraf‑ı humâyûnuma arz idesin.


Şevketlü Kerâmetlü Mehâbetlü Kudretlü Veliyy‑i ni‘metim Efendim Pâdişâhım
Şâm‑ı Şerîf tarafından vürûd eden tahrîrât mâdde‑be‑mâdde hulâsa etdirilip dünki gün atebe‑i ulyâ‑yı mülûkânelerine arz olunmağın şeref‑yâfte‑i sudûr olan hatt‑ı humâyûnları mûcebince tahrîrât‑ı mezkûrede mestûr olan mevâddın nizâmına eğerçi ihtimâm‑ı bendegânem masrûf olup ancak Dimaşk‑ı Şâm eyâletine tâbi‘ Havran nâm nâhiyede vâkî‘ Eski Şâm demekle ma‘rûf Busra nâm kal‘adan kal‘ u celb ve tahtrevân misillü iki re’s katıra tahmîl ile Şâm‑ı Şerîf’e nakl ve müteveffâ Esad Paşa’nın hânesine vaz‘ u nasb olunan seyyid‑i veled‑i âdem, şefî‘ul‑ümem, nebiyyü’l‑Arab ve’l‑Acem, el‑meb‘ûsü kâffeten‑li’l‑âlem, sallallâhu aleyhi ve âlihi ve sellem hazretlerinin kadem‑i muhteremlerini muhtevî bir kıt‘a hacer‑i mu‘ciz-eser‑i mufahhamın berren ve bahren nakli mümkin olmağla bu cânibe ityânı ve yâhud Câmi‘‑i Emeviyye’de merkad‑i münîr‑i Hazret‑i Yahya aleyhisselâm kurbunda cümle‑i âsâr‑ı cihân-dârîden olmak üzre bir mahal ihyâsıyla anda ikâmesi husûslarına dâ’ir emr u fermân‑ı cihân‑bânî ne vechile cereyân buyurulacağı tahrîrât‑ı merkûmede başkaca bir bend olarak istifsâr olunduğuna binâ’en mâdde‑i mezkûrede emr u fermân‑ı husrevânîleri ne vechile olduğunu isti‘lâm ve istibyân içün tahrîrât‑ı mezkûreden madde‑i mezkûre başkaca ihrâc ve huzûr‑ı âlîlerine arz olundu. Manzûr ve ma‘lûm‑ı humâyûnları buyuruldukda zikr olunan kadem‑i muhterem‑i Nebevî’nin ziyâretgâh‑ı hâss u âm olan makâma vaz‘ı züvvârının teksîr‑i tuhaf‑ı salât u selâmlarını mûcib olacağı âşikâr olmağla tahrîr olunduğu üzre Câmî‘-i Emeviyye’de merkad‑i mukaddes‑i Hazret‑i Yahya salavâtullâhi alâ nebiyyinâ ve aleyhi kurbunda mahall‑i mahsûsda tevkîfi ve yâhud bu cânibe celb ile âsâr‑ı hayriyye‑i Hudâvendigârî’den türbe‑i cedîdenin civârında ziyâretgâh olacak bir mahall‑i mahsûsa vaz‘ı şıklarından kangısına irâde‑i aliyye‑i tâc‑dârîleri ta‘alluk eder ise her hâlde emr u fermân şevketlü kerâmetlü mehâbetlü kudretlü veliyy‑i ni‘metim efendim padişahım hazretlerinindir.

Arşiv Okumaları / 116

Şevketlü kerametlü mehabetlü kudretlü velî-ni'metim efendim 
Silistre Valisi Rüşdü Paşa kullarının mühürdarı divan-ı hümayun kalemi ketebesinden Ahmed Keşşaf hilâf-ı rıza harekete cesaret eylediğine mebni mukaddemce li-ecli't-te'dîb İstanköt ceziresine ba'de'n-nefy keyfiyyet taraf-ı çâkerîden müşarun-ileyhe iş'âr olundukda vürûd eden cevabnamesinde isabet olub merkumun hilaf-ı rıza-yı âlî hareketi kendüsünün dahi mesmû'u olsa icra-yı levazım-ı te'dîbine ibtidar edeceğini inha ve işaret etmişdi bu defa müşarun-ileyh kullarının kapu kethudasına vürûd eden bir kıt'a şukkası mealinde merkumun nefyi eyaletin her tarafına şâyi' olarak nâs beyninde bir takım güftegûyu mucib ve bazı umûr ve maslahatlara mazarratı meşhûd olduğundan merkumun kayd-ı nefyden ıtlak ve tarafına irsal olunmasını iltimas etmekle verilen ferman kaydı ihrac etdirilüb manzur-ı me'âlî-mevfûr-ı şahaneleri buyrulmak içün arz u takdim kılındığı muhat-ı ilm-i âlîleri buyruldukda İstanbula gelmeyüb menfasından doğru müşarun-ileyhin yanına gitmek üzre mezburun afv ü ıtlakı muvafık-ı irade-i merhamet-'âde-i mülûkâneleri buyrulur ise emr u ferman şevketlü kerametlü mehabetlü kudretlü velî-ni'metim padişahım hazretlerinindir. 

 Kaimmakam Paşa mir-i 'alem ve müteferrika başı defteri kapucubaşı  ve zuema esamileriyle memlû iki selamlıkda gelen bir kaç ademden ibaret olub anlar dahi zabitanının ibram ü ilhahıyla ve kapu nöbetini kendülerine nimet ve iftihar bilürler iken anı dahi aetmangaryaadavetden ma'dûd eylemişler anlaşıldıki bundan kesreti rif'atlerini izale ve tenziliyyetli mucib etmiş

 Benim vezirim müşarun-ileyhin inhası ve takririn mucebince bu tarafa gelmeyüb doğru müşarun-ileyhin yanına gitmek şartıyla muma-ileyhi ıtlak eyleyesin


Not:Bubelge Osmanlıca Tarih Edebiyat grubu üyeleri tarafından çevrilmiştir.

Osmanlıca Tarih Edebiyat grubuna ulaşma linki

Arşiv Okumaları / 115

Şevketlü kerametlü mehabetlü kudretlü velî-ni'metim efendim
Bostancıbaşı esbak Mahmud Ağa kulları hala sekbanbaşı ağa bendelerinin mahzar ağalığında bostancılar odabaşısı bulunub ol zamandan berü

 Miyanelerinde ihtilat ve ülfet ber-karar ve muma-ileyh bostancıbaşılıkdan müddet-i kalile zarfında azl olunub bostancıbaşı ma'zûlleri öteden berü ekseriya kapucubaşılıkile bekâm oldukları deydene-i hasene-i saltanat-ı seniyyeden idüğü derkar olduğundan saye-i merahim-vaye-i
 
Şahanelerinde emsali misillü muma-ileyhin dahi kapucubaşılık ile çerag ve ihya buyrulmasını sekbanbaşı ağa kulları mahsusan iltimas etmekden naşi rikab-ı hümayunlarında sebkat eden hizmetine şefkaten muma-ileyhin kapucubaşılık ihsanıyla çerag buyrulması muvafık-ı irade-i 

 Aliyyeleri olur ise iktiza eden rü'ûs-i hümayunu tasdir etdirileceği muhat-ı ilm-i âlîleri buyruldukda emr u ferman şevketlü kerametlü mehabetlü kudretlü velî-ni'metim efendim padişahım hazretlerinindir


Ağa-yı muma-ileyhin kapucubaşılık ile çeraklığı hususu selef-i çaleri vaktinde işbu takririyle arz u istizan olunmak üzre iken tebeddül-i vukuuna mebni te'hîr olunmuş olmağla mücerred manzur-ı şahaneleri buyrulmak içün arz u tesyir kılındığı malum-i hümayunları buyruldukda emr u ferman hazret-i men lehü'l emrindir

Not: Bu belge Osmanlıca Tarih Edebiyat grubu üyeleri tarafından çevrilmiştir.

Osmanlıca Tarih Edebiyat grubuna ulaşma linki

Arşiv Okumaları / 114

Şevketlü kerametlü mehabetlü kudretlü velî-ni'metim efendim Kudüs-i Şerifde vâki' Suhratullahi'l müşerrefe ve Mescid-i Aksanın muhtac-ı tamir olan mahalleri lede'l-keşf iki yüz seksen buçuk kese bu kadar guruş masarif ile vücuda

 geleceği inha olunmakdan naşi mesarif-i mezkure sabıkı vechile Hama ve Lazkiyede kain Şeyh Abdullah El-Barzi ve Halime hatun vakflarının sinin-i güzeşte mal-ı harameynlerinden teraküm eden mebaliğden ve haramlık hazinesinden verilmek üzere tanzimi babında emr ü şerif verilmiş ve evkaf-ı mezkurenin sinin-i güzeşte mal-ı harameynleri

 Telef olduğu inha olunmuş ise de masarif-i mezkure içün mal-ı vakfdan muhavvel etmiş iki bin şu kadar guruşdan mâ-'adâ tekmiline lazım gelen mebaliğ haremeyn-i şerifeyn hazinesinden te'diyye kılınacağına binaen mal-ı vakf ba'dehû mahallerinden tashih ve tahkik olunarak tahsil ve teslim olunmak üzre evvel emrde haremeyn hazinesinden

 İ'tâsı irade buyrulur ise iktiza eden evamir ve ilm ü haberleri verilmek iktiza edeceğini defterdar efendi kulları bir kıta takrir takdimiyle inha etmekle manzur-ı mülûkâneleri buyrulmak içün merfû'-ı hâk-i pâ-yı mekârim-intimâ-yı hümayunları kılındığı muhat-ı ilm-i âlîleri buyruldukda bu babda ve her halde emr u ferman şevketlü kerametlü mehabetlü kudretlü velî-ni'metim efendim padişahım hazretlerinindir 
 Manzurum olmuşdur bunun ter ü te'hîri tecviz olunamaz defterdarın takriri mucebince Haremeyne ilm ü haberi verilüb takrirde mezkur olan vakfların dahi mal-ı haremeyne tahkik ve tahsil olunmak içün evamir gönderilsün mümteni'u'l husul ise âhâr mal-ı haremeyn bulunub andan havale olunsun şimdilik havaleden mâ-'adâ iktiza eden akçe Haremeyn hazinesinden verilüb tanzimine bakılmak lazımdır 

Not: Bu belge Osmanlıca Tarih Edebiyat grubu üyeleri tarafından çevrilmiştir. 

Osmanlıca Tarih Edebiyat grubuna ulaşma linki

Arşiv Okumaları / 112

Şevketlü kerametlü mehabetlü kudretlü velî-ni'metim efendim Vaka'-i fesadın bidâyet-i zuhûrunda ocağ-ı âmire tarafından li-ecli'l muhafaza kal'a kapularında altı mahalle birer turnacı kulları tayin olunmuş olarak 

 Kullarından mukaddem hayli vakit ol tarafda memuren ikamet etmiş olan ser-turnacı Hasan Ağa kulları dahi el-hâletü hâzihî memuriyyet-i mezkureden münfekk olmuş ise de emeği mesbuk ve zatında mağdur ve şayan-ı lutf ü merhamet olmak mülabesesiyle kezâlik muma-ileyhin dahi tatyibi

 Mumâ-ileyhim ile'l-ân memur oldukları mahallerde mukîm ve hıfz u hırâsetle meşgul olduklarına binaen mesarif-i vâkıalarına medar olmak içün kendülere birer mikdar atiyye-i seniyye-i şahaneleri ihsan buyrulması münasib göründüğünden ve bunlardan başka el-yevm Büyükdereye memur sekbanbaşı Mustafa Ağa

 Münasib olduğundan cümlesinin mahâll ve esamisini mübeyyin bir kıta defteri terkim ve hâk-i pâ-yı şahanelerine arz u takdim kılınmış ve muma-ileyhim kullarına ale's-seviyye beşer kese akçe  ataya-yı seniyye-i şahaneleri inayet ve ihsan buyrulması hatır-güzar olmuş ise de ne vechle 

İrade-i mekârim-âde-i şahaneleri sunûh ve sudûr buyrulur ise emr u ferman şevketlü kerametlü mehabetlü kudretlü velî-ni'metim efendim padişahım hazretlerinindir 

Benim vezirim pek münasibdir mumâ-ileyhimin beherine beşer keseden ve otuz beş kese defterdardan getürdüb yeniçeri ağası marifetiyle tevzi' ve i'tâ etdiresin 

Not: Bu belge Osmanlıca Tarih Edebiyat grubu üyeleri tarafından çevrilmiştir.

Osmanlıca Tarih Edebiyat grubuna ulaşma linki

Arşiv Okumaları / 111

Hû
ihsan-ı hümayunum olmuşdur.

Bazergan kalyonları kapudanlarından Hacı mustafa kapudanın kalyonu malum-ı hümayunları buyrulduğu üzere Kumkapı kurbunda kenare düşüb şikest olduğuna binaen merkum kulları sabıkda olduğu üzere tersane-i amirede olan kalyonlardan bir kıt'a kalyon istid'a idüb keyfiyyet Kapudan Paşa kullarına havale olundukda rical-i tersane-i Amire ile müzakere ve Kapudan-ı merkuma merhameten kalyon ihsanı irade-i aliyye buyurulur ise hala keraste kalyonu olan Hümâ-yı bahrî kalyonundan münasibi olmadığını ve kalyon-i mezbûrun âlâtları ve bozulduğu suretde demirleriyle kerestesi keşf olundukda mecmuunun bahası dört bin altı yüz on altı guruş tahmin olunduğunu kapudan paşa kulları İ'lâm edüb lakin yüz elli sekiz tarihinde Çatladukapu önünde kalyonu şikest olan el-Hâc Ömer oğlu Mustafa Kapudan donanma-yı hümayun kalyonlarından merhameten bir kıta kalyon ihsan buyruldukda hatt-ı hümayun-i şevket-makrun keşide buyrulduğuna binaen bu defa dahi ihsan-ı hümayununm olmuşdur deyü hatt-ı hümayun-i şevket-makrunları keşide buyrulur ise emr u ferman hazret-i men lehü'l emrindir.

Sahh

Şeref-yafte-i sudur olan hatt-ı hümayun- ı mevhibet-makrun mucebince izzetlü Defterdar efendi görüp i'lam eyleyesin deyu buyuruldu.


Not: Bu belge Osmanlıca Tarih Edebiyat grubu üyeleri tarafından çevrilmiştir.

Zafer Şık
Osmanlı Türkçesi Arşiv Uzmanı

Osmanlıca Tarih Edebiyat grubuna ulaşma linki

Arşiv Okumaları / 110

Şevketlü kerametlü mehabetlü kudretlü velî ni'metim efendim Niğde Sancağı mutasarrıfı Ragıb Paşa kulları tarafından bu defa vârid olan tahrirart mealinde bâ-emri âlî memur-i te'dibi olduğu Develü oğlu

 Ömer oğlu koca nma şekavet-pîşelerin sâkin oldukları Develü kazasına top ve mühimmat ve asakir ile kethudasını tayin ve irsal ve kendüsü dahi hareket ile etrafından hasr u tazyîk olunarak merkumlar ber-takrib Kozan dağı tarafına firar etmiş ve mütehassın oldukları 
 Konak ihrak ve haneleri marifet-i Şer' ve cümle marifetiyle temhîr olunmuş idüğü haberi esna-yı rahda kendüsü geldiği ve merkumlara dair tarafına gönderilen emr-i âlîde def'-i gâileleri şıkkeyn vechle münderic olmak hasebiyle bu vechle icra olunmuş idüğü ve merkumların iltica eyledikleri Kozan dağlı

 Bir müddetden berü âhâr sancak ve eyalete ilhak verilmek hasebiyle liva-i mezburda sergerdelerden biri mütesellim tayin ve bir takım delil neferatı ikame olunarak ahali ve fukara âzürde ve hasar-dide olub bu esnada müşarun ileyhin vürûdu takririyle haşerat mündef'i olmuş

 Kırti'li ekradı ve ve Avşar ve Kerim oğulları aşairi Adana a'yanı Hasan Paşazade Muhmed Beğin re'yinde olduğundan hayyen ve meyyiten ele getürülmesi hususunu valisine tahrir etmiş ise de müekkeden emr-i âlî dahi gönderilmesi muharrer-i mestur olduğundan maada Aksaray Sancağı 
 Ve ebna-yı sebile emniyyet-i tâmme gelmiş idüğünden bahsle liva-i mezburun ilhaken müşarun-ileyhe tevcihi istid'âlarını mübeyyin Niğde naibiyle i'lâmıyla ahalinin bir kıta mahzarını isrâ etmekle manzur-i me'âlî-mevfur-i şahaneleri buyrulmak içün arz u takdim kılındı liva-i mezbur el-yevm

 Mir-i mirandan Zeynelabidin paşa uhdesinde ve ol-dahi kapudan paşa kulları maiyyetinde olmağla  Niğde ye semt-i ahar bir münasib sancağın. Müşarun ileyhe ilhakıyla yalnız Niğde vezir idaresine mütehammil olmadığından olvechile ikdarı ve salifüzzikr emr-i Ali'nin ısdarı 
 Muvâfık-ı irâde-i seniyye-i şahaneleri ise her halde emr u ferman şevketlü kerametlü mehabetlü kudretlü velî ni'metim efendim padişahım hazretlerinindir

 Benim vezirim firar eden şakîlerin 'alâ eyyi hâl ele getürülmesiçün Adana valisine müekked emr-i âlî ısdar ve irsal eyleyesin fî'l hakika yalnız Niğde Sancağı bir veziri idare edemez Aksaray Sancağı Niğdeye ilhakan müşarun-ileyhe verilse de Zeynel Abidin Paşaya âhâr bir münasib mansıb verilse yahud yine Aksaray Sancağı gibi Niğdeye muttasıl âhâr sancak var ise ilhak olunsa münasib olur zann ederim Zeynel Abidin Paşanın uhdesinde Aksaraydan ma-ada bir mansıb dahi vardır gibi hâtırıma gelür bunları tahkik edüb münasibini bi'l mülahaza tekrar arz eyleyesin 

Not : Bu belge Osmanlıca Tarih Edebiyat grubu üyeleri tarafından çevrilmiştir.

Zafer Şık
Osmanlı Türkçesi Arşiv Uzmanı

Osmanlıca Tarih Edebiyat grubuna ulaşma linki