Arşiv Okumaları / 107

Şevketlü kerametlü mehabetlü kudretlü velî ni'metim efendim
bundan akdem umûmî meclis-i şûrâ akdine semâhatlü Şeyhulislâm Efendi dâ'îlerinin hanesinden bed' ile bir müddet anda ve ba'dehû

 Gâh bâb-ı âlîde ve gâh bâb-ı fetvâ-penâhîde akd oluna gelür iken geçen çarşamba günü tersanedesefayin-i hümayun techiz ve ihracı hususunun fezleke ve kararı zımnında çâkerleri ve semahatlü şeyhulislam efendi ve sudûr-i kiram dâ'îleri ve erbab-ı şura ve ocak ağaları 
 ve ihtiyarı azimet ve kapudan paşanın makarrı olan divanhanede tersane ricali dahi celb olunarak bi'l-ictimâ' akd-i meclis olunmuş olmak mülabesesiyle sebeb-i tezayüd-i ittihad-ı kulûbe vesile-i kaviyye olmak içün bi-mennihî te'âlâ yarınki cumartesi günü heyet-i mecmuamız ile ağa kapusuna 
 Azimet birle ocağ-ı âmirenin meclise dahil olan ihtiyarları biraz tevsi' olunarak cümle erbab-ı şura ile anda akd-i meclis-i meşveret olunması sureti semahatlü şeyhulislam efendi dâ'îleriyle bi'l müzakere tensib olunmağla muvafık-ı irade-i seniyye-i mülûkâneleri buyrulur ise 
 İcrasına ibtidar olunacağı muhât-ı ilm-i âlîleri buyruldukda emr u ferman şevketlü kerametlü mehabetlü kudretlü velî ni'metim padişahım hazretlerinindir

 Benim vezirim

Pek münasibdir yarınki gün dahi heyet-i mecmuanız ile ağa kapusuna azimet ve ocağ-ı âmirenin meclise dâhil olanları biraz tevsi' olunarak akd-i meclis olunub  İzmir ve Mağnisada vukû' bulan ihtilalin def'ine dâir müzakeresi lazım gelen hususat dahi etrafıyla söyleşilsün bende olan takriri dahi diğer tekârîr ile tekmil etdiğimde heman tarafına irsal ederim

 

Not : Bu belge Osmanlıca Tarih Edebiyat grubu üyeleri tarafından çevrilmiştir.

Zafer ŞIK
Osmanlı Türkçesi Arşiv Uzmanı

Osmanlıca Tarih Edebiyat grubuna ulaşma linki