Arşiv Okumaları / 90

şevketlü kerametlü mehabetlü kudretlü veli-nimetim efendim 

devletlü ismetlü hadice sultan aliyyetü'ş-şan hazretlerinin kethüdaları Mustafa Reşid Efendi kulları bir kıta takrir takdim idüp mealinde müşarün-ileyha hazretlerinin havass-ı aliyyelerinden Niğbolu sancağında vaki ziştovi kazası istila-dide ve harab ve reayası perişan olduğundan reayasının celbi ve kaza-yı mezburun imarı hususlarına say u gayret ederek 

 emaneten ve 28 senesine mahsuben iltizamen ba-irade Boşnak ağaya ihale olunup 29 senesi dahi hasbe'l-maslaha muma-ileyhe ilzam olunmuş ise de merkum bu esnada vefat edüp mukataa-i mezkurenin muma-ileyh Feyzi ağa kullarına ihalesi hususunu istizan etmek üzere iken kaza-yı mezbur tarafından arz ve mahzar vüruduyla mukataa-i mezburenin sultan

 Müşarünileyha tarafindan bir adem irsaliyle zabt ettirilmesi istid'a olunmuş olduğundan ol-vechile adem irsaliyle zabtı veyahud mumaileyh ağa bendelerine ihalesi ususiyetlerini istizan ve inha ve muahharen ahali-i merkume istid'a-yı mezkurden nükül ile mukataa-i mezburenin muma-ileyh feyzi ağaya tefviz olunmasını mübeyyin gönderilen Ziştovi kadısının bir kıta 
 ilamını dahi isra etmekle cümlesi manzur-ı şahaneleri buyrulmak içün merfu atebe-i ulya-yı mülûkaneleri kılındı mekarim-mezlum-ı mülükaneleri buyrulduğu üzre mukataa-i mezbura geçen sene ba-irade-i seniyye muma-ileyh Feyzi ağa kullarına ihale olunmuşken merkum Boşnağın vaki olan müdahelesine ve ol-vakt Vidin maslahatına me'muriyyeti cihetiyle is'af-ı mes'ulünün 
 zabt u rabt eylemesiçün mukaddema 226 senesine mahsuben Tırnovi voyvodası kapucubaşı Feyzi ağa bendelerine emaneten ihale olundukdan sonra Maçin ayanı genç ağa kaza-yı mezbure duhul ile voyvoda-yı mumaileyhin adamını tard edip başında bulunan eşhas ile tekrar Ziştovinin perişanlığına sebeb olmuş ve badehu mukataa-i mezbure yirmi yedi senesine mahsuben 

 haSb'el-maslaha icabına bi'l-istizan muma- ileyh feyzi ağaya taraf-ı çakeriden yazılub beyne'l-emsal kesr-i' İ'tibarına bakmayarak imtisalen derhal mukata'a-i mezkureden keFf-i yed etmişidi el-haletÜ hazihi merkum boşnağın fevti vuku'uyla mukata'a-i merkume tabi'atiyle hali kalub mukaddemce vürud eden arz ve mahzara beyan olunduğu vechile ahara ihale olunmaktan ise 

sultan-ı müşarün-ileyha tarafından adam irsaline zabt ve idaresi cümleden ahsen ise de vukuf-ı hakayık-sunuf-ı cihan-darilerine gayr-i hafi olduğu üzre ziştovi kazası istila görmüş ve henüz reayası gelip YERleşmemiş olmak hasebiyle gidecek adamın hüsn-i idare ve imara muvaffak olup olamayacağı meşkuk ve muma-ileyh feyzi ağa kullarının meşhud olah 

 hüsn-i idaresine civarda olduğuna nazaran imaRi-i memleket ve himayet-i fukara-yı ra'iyyete sa'y u gayret eylemesi me'mul olduğundan gayri ahali dahi yine anı istid'a etmiş olduğundan geçen sene hasBe'l -iktiza yedinden alınmış olduğuna bedel her vechile i'marına sa'y eylemek şartıyla 29 senesine mahsuben mukata'a-i merkumenin muma-ileyh feyzi ağa kullarına 

 ihalesi veyahuf sultan-ı müşar-ün ileyha tarafından adem irsaliyle idaresi hususlarından kangısı muvafık irade-i seniyye-i mülukaneleri ise emr u ferman şevketlü kerametlü mehabetlü kudretlü veli-nimetim efendim padişahım hazretlerinindir. 
 manzurum olmuştur  işbu takririn meali malum-ı hümayunum olmuştur ziştovi fi'l-hakika tahririn gibi perişandır amma feyzi dahi boşnağın biraz zayıfçasıdır eline fırsat geçirdiği ana döner sultan tarafından bilmedik adam gitmek hiç uymaz cem-i mukataat hakkında olan iradem üzere kavi sarraf taahhüdleriyle Niğbolu sancağı mutasarrıfı olan vidin muhafızı hafız ali paşaya verilsin 

Not : Bu belge Osmanlıca Tarih Edebiyat grubu üyeleri tarafından çevrilmiştir.

Zafer Şık
Osmanlı Türkçesi Arşiv Uzmanı

Osmanlıca Tarih Edebiyat grubuna ulaşma linki