Arşiv Okumaları / 100

Şevketlü kerametlü mehabetlü kudretlü velî ni'metim efendim 

Bu defa bi'l-yümni ve'l-ikbal ziver-efza-yı gehvâre-i zuhuri ve'l ibcal olan veladet-i hümayun-i meyamin-makrun-i cihan-banilerinin memalik-i mahrusede kâin kâffe-i 

 Aktar u buldana tebşir u i'lânı zımnında evamir-i aliyye neşr u irsali de'b-i dirin-i saltanat-ı seniyyelerinden olub mukaddemleri bazen vuku bulan veladet-i bâ-saadet-i mülûkânelerinde mukteza-yı irade-i seniyye-i şahaneleri üzre Rumekli ve Anadolunun üçer kollarına yazılan altı kıta evamir tatarlar ile irsal

 Ve Cezayir ve Trablus ocakları fermanları dahi kapudan paşaya verilerek anın tarafından îsbâl olunmuş ve Bağdad ve Basra ve Şam ve Girid ve Mora ve Kıbrıs misillü on kadar mütehammil mahallere dahi başka başka fermanlar yazılarak bazı müstehakkîne ve hademeden tayin olunan mübaşirlere i'tâ kılınmış ise de el-hâletü hâzihî 
 Rum fesadının zuhurundan berü asker ve sair mürettebat ve matlubat içün peyderpey fermanlar ve mübaşirler gönderilmekde ve ahali-i fukara kesret-i mesarife mübtela olmakda olduklarına nazaran bir tarafın hal u keyfiyyeti evvelki vakte makıs olmadığı müstağni-i tarif u beyan olduğuna binaen saye-i merahim-vaye-i zıllullâhîlerinde gerek fukara

 Ve gerek hizmet-i memuriyyetde bulunan memurîn ve vüzera kullarına bir nev' bâr olmamak içün mukaddemki veladet-i hümayun-i mülûkânelerinde muktezâ-yı irade-i seniyye-i şahaneleri üzre Anadolu ve Rumelinin üçer kollarına hitaben kemâ fî's-sâbık altı kıta evamir ısdar ve götüren tatarın be-her kazadan yirmi beşer guruş 
 Verilmesi derc ü tezkar kılınarak ocakdan birer münasib tatarlar ile isra olunmuş ve Cezayir ocaklarının evamiri dahi kapudan paşa kulları tarafına ve Girid ve Sakız ve Kıbrıs ve İstanköy ve Limni cezireleri misillü Akdeniz Cezayiri evamiri dahi Kapu Kethudalarına verilerek ve hizmet-i mübaşiriyye alınmamak üzre tenbih olunarak 
 gönderilmiş ve kul fermanlarından haric olarak fakat bağdad ve mısır valilerine müstakilce iki kıta ferman yazılub anlar dahi kapu-kethüdalarına i'ta ile irsal  kılınmış olduğundan bu defa dahi yine ol-vechile tasdir ve icrası hususunda nevechile irade-i seniyye- i mülükaneleri sünuh ve sudur buyrulur ise ana göre

 Mukteza-yı münîfi icrasına ibtidar olunacağı muhat-ı ilm-i âlîleri buyruldukda emr u ferman şevketlü kerametlü mehabetlü kudretlü velî nimetim efendim padişahım hazretlerinindir 
 benim vezirim ne fukarada ne vüzerada tab u takat kalmadı yine evvelki gibi anadolu ve rumelinin üçer koluna tatarlar ile irsal olunub bağdad ve mısır valilerine gidecek fermanları kethüdalarına teslim oluna


Not : Bu belge Osmanlıca Tarih Edebiyat grubu üyeleri tarafından çevrilmiştir.

Zafer Şık
Osmanlı Türkçesi Arşiv Uzmanı

Osmanlıca Tarih Edebiyat grubuna ulaşma linki